د بادغیس ولایت له پېښو سره د مبارزې آمادګۍ ریاست ۲,۵۷۷ وچکالۍ ځپلو کورنیو ته نغدي مرستې ووېشلې
له پېښو سره د مبارزې آمادګۍ ملي ادارې او د World Vision مؤسسې ترمنځ د لاسلیک شوي هوکړه لیک له مخې، د بادغیس ولایت له پېښو سره د مبارزې آمادګۍ ریاست د یادې مؤسسې په مالي ملاتړ، د دې ولایت په مقر، سنګآتش، غورماچ، بالامرغاب او جوند ولسوالیو کې ۲،۵۷۷ وچکالۍ ځپلو کورنیو ته نغدي مرستې ووېشلې.
په دې لړۍ کې د مسؤلینو په شتون کې، د جوند ولسوالۍ ۱،۵۰۰ کورنیو ته د لومړي پړاو په توګه هرې کورنۍ ته ۲،۵۹۰ افغانۍ ورکړل شوې. همدارنګه، د مقر، سنګآتش، غورماچ او بالامرغاب ولسوالیو ۱،۰۷۷ کورنیو ته د درېیم او څلورم پړاو په توګه هرې کورنۍ ته ۵،۴۰۴ افغانۍ ووېشل شوې.
د یادونې وړ ده، چې د World Vision موسسې له لوري د ۲،۵۷۷ کورنیو لپاره ټولټال نه میلیونه او اوه لکه او پنځه زره او یو سل او اته (۹،۷۰۵،۱۰۸) افغانۍ ځانګړې شوې وې.
په پای کې د مرستو ترلاسه کوونکو کورنیو د یاد ریاست او مؤسسو له مسؤلینو څخه د مرستو ورکولو له امله خوښي څرګنده کړه او له هغوی څخه یې مننه وکړه.
نېټه: ۱۴۴۷/۱۱/۰۴ هـ ق
له پېښو سره د مبارزې آمادګۍ ملي اداره
