د پنجشېر ولایت په دره او رُخه ولسوالیو کې د لارو پاکولو او د څښاک اوبو د نللیکو د ترمیم چارې په چټکۍ سره روانې دي
د پنجشېر ولایت له پېښو سره د مبارزې آمادګۍ ریاست، د وروستیو سختو سېلابونو له امله د رامنځته شویو ستونزو د هواري په موخه، په دره او رُخه ولسوالیو کې د مواصلاتي لارو د پاکولو او د څښاک اوبو د نللیکو د ترمیم عملي چارې پیل کړې دي.
له پېښو سره د مبارزې آمادګۍ ریاست مسؤلینو وویل، چې اړین ماشینونه او امکانات زیانمنو سیمو ته لېږدول شوي او د رُخه ولسوالۍ د حصارک سړک، چې په درېیو ځایونو کې د سېلابونو له امله ویجاړ او د ترافیکو پر مخ تړل شوی و، بېرته پاک او ورغول شو. همدارنګه د درې ولسوالۍ د کرمان د چل پاوي بازار په سیمه کې هغه سړک هم ورغول شو چې د عبداللهخېلو درې او آبشار ولسوالۍ ترمنځ یې مواصلاتي لار تړلې وه، او اوس د ترافیکو پر مخ بېرته پرانیستل شوې ده.
همدارنګه د سېلابونو له امله د درې ولسوالۍ د کرمان سیمې په اسکنیاز، پخ بالا او پخ پایین کلیو کې د څښاک اوبو نللیکې زیانمنې شوې وې، چې د پنجشېر ولایت له پېښو سره د مبارزې آمادګۍ ریاست له لوري د ولایت مقام په همکارۍ ترمیم او بېرته فعالې شوې. همدارنګه د نویجه او قلعهنو کلیو د اوبو د نللیکو د ترمیم چارې هم په چټکۍ روانې دي.
د پنجشېر ولایت له پېښو سره د مبارزې ولایتي کمېسیون تخنیکي او سروې ټیمونه په زیانمنو سیمو کې د زیانونو د ارزونې، د زیانمنو کورنیو د تثبیت او اړتیاوو د تشخیص چارې پر مخ وړي، ترڅو اغېزمنو کورنیو ته پر وخت لازمې مرستې ورسول شي.
د پنجشېر ولایت له پېښو سره د مبارزې آمادګۍ ریاست ډاډ ورکړی چې د پاکولو، بیارغونې او د زیانمنو کورنیو د ملاتړ چارې به د ستونزو تر بشپړ هواري او عادي وضعیت تر بېرته راګرځېدو پورې دوام ولري.
نېټه:۱۴۴۸/۲/۱۱ هـ ق
له پېښو سره د مبارزې آمادګۍ اداره
