په کابل کې ۷۰۰ زیانمن شویو کورنیو ته د خوراکي او غیر خوارکي مرستو وېش
کابل- د وړي ۲۹مه- ۱۴۰۱
پېښو ته د رسېدو په چارو کې د دولت وزارت، د خپلو بشري مرستو په دوام کې نن ورځ په کابل کې ۷۰۰ اړمنو او مستحقو کورنیو ته ۵ قلمه خوراکي او غیر خوراکي توکي ووېشل.
الحاج غلام غوث ناصري د پېښو ته د رسېدو په چارو کې د دولت وزارت د مالي او اداري عمومي رییس، د دغو مرستو د وېش په پروګرام کې وویل: د خوراکي او خوراکي توکو د وېش لړۍ چې ۵۰ کیلو غنم، ۱۰۰ کیلو وریجې، یو عدد نارینه جامې، یو عدد ښځینه جامې او یو جوړه څپلکې په کې شامل وې، پیل شوه.
ښاغلي ناصري زیاته کړه چې دغه مرستې به د نورو ولایتونو زیانمن شویو او اړمنو ته هم دوام ومومي. همدارنګه هغه له هیوادونو او ملګرو ملتونو څخه د افغانستان خلکو لپاره د بشري مرستو د دوام غوښتونکی شو.
وروسته ملاجانان سایق د بېړنیو حالاتو د عملیاتو د مرکز رییس وویل: دغه کورنۍ د کابل په بېلابېلو سیمو له بشپړې سروې وروسته په ګوته شوي او هغوۍ ته خوراکي او غیر خوراکي توکي ووېشل شول.
ښاغلي سایق همدارنګه وویل چې د افغانستان اسلامي امارت له بریا څخه تراوسه دې وزارت د ملي او نړیوالو موسسو سره په همکاري، د ۱۶۰ زرو څخه زیاتو زیانمن شویو او اړمنو کورنیو ته خوراکي، غیرخوراکي او نغدي پیسې وېشل شوي دي.
