د پکتیکا ولایت پېښو سره د مبارزې کمېټې غونډه ترسره کړه
د پکتیکا ولایت پېښو سره د مبارزې کمېټې غونډه نن (سه شنبه، د چنګاښ ۳۱مه) د ښاغلي غلام بهاوالدین جیلاني پېښو ته د رسېدو په چارو کې د دولت وزیر په مشرۍ د ډاکټر مجیب الرحمن څمکنی د پکتیکا ولایت والي، ډګروال نثار احمد عبدالرحیمزی امنیه قوماندان، ښاغلي عزیز عزیز د ولایتي شورا مرستیال، ښاغلي مطیع الله صافۍ پېښو ته د رسېدو په چارو کې د دولت وزارت مالي او اداري مرستیال، د دولتي ادارو رییسانو او د موسسو استازو په ګډون پکتیکا ولایت کې ترسره شوه.
لومړۍ ډاکټر مجیب الرحمن څمکنی د پکتیکا ولایت والي په تیرو کلونو کې د بارانونو، سیلابونو او وچکالۍ د اغیزو له امله د زیانونو یادونه وکړه، او د پېښو څخه زیانمنو ته د رسېدو او د پېښو له خطرونو څخه مخنیوي لپاره د وقایوي برنامو پلي کېدو غوښتونکی شو.
ورپسې د پکتیکا ولایت پېښو سره د مبارزې رییس، سږ کال په دغه ولایت کې د سیلابونو پېښېدو د لاملونو او پایلو په اړه معلومات وړاندې کړل، او د وضعیت د ښه والي لپاره یې وړاندیزونه په ډاګه کړل. همدارنګه د کلیو د بیارغونې او پراختیا، کډوالو او بیرته راستنیدونکو رییسانو او د موسسو استازو د هغوی د فعالیتونو په اړه مفصل راپورونه وړاندې کړل.
وروسته ښاغلي غلام بهاوالدین جیلاني پېښو ته درسېدو په چارو کې د دولت وزیر د ولایت مقام د پلانونو او برنامو له اوریدو وروسته وویل: پکتیکا ولایت ته زموږ د سفر موخه د ستونزو، ننګونو، سیلابونو او وچکالۍ له امله زیانمنو څېړنه او د سیلابونو پر وړاندې د زیانمنو سیمو لیدل دی.
پېښو ته د رسېدو په چارو کې د دولت وزیر د وقایوي برنامو په نیولو سره د طبیعي پېښو مخنیوي او د طبیعي پیښو له زیانمنو سره د مرستې په خاطر د پکتیکا ولایت د طبیعي پیښو پروړاندې د مبارزې عالي کمیټې او نړیوالو موسسو ترمنځ پر لاهمغږۍ ټینګار وکړ.
د غونډې په پای کې، د طبیعي پېښو خطرونو اطلس چې پېښو ته د رسېدو په چارو کې د دولت وزارت لخوا چمتو شوی و، د پکتیکا ولایت پېښو سره د مبارزې عالي کمېټې ته وسپارل شو.
