د پېښو چارو د انسجام معين په شتون کې د کابل ښار د دویمې ناحيې اړوند د بهارستان لوړ غره په سیمه کې د ښویېدو له خطر سره د مخ ډبرو سروې وشوه
نن ورځ د دو شنبې په سهار د ۲۹/۱۲/۱۴۴۷ هـ.ق نېټه، له پېښو سره د مبارزې آمادګۍ ادارې د پېښو چارو د انسجام معين، محترم الحاج ملا عبدالولي څارنوال (حاجي وارث)، د خطر د مخنیوي او کمولو رئيس، محترم حاجي اختر محمد خادم، د کابل ولايت پېښو ته د رسېدنې آمر، مولوي حنيف همدرد او يو تخنيکي، مسلکي او تجربه لرونکي ټيم، چې د څېړنې او مطالعاتو آمر، مجتبی افضلي، د پېښو د تحليل او ارزونې کارپوه، انجنير الله داد قرلق، د پېښو د خطرونو او اغېزو د مخنيوي او کمولو کارپوه، انجنير جلالالدين جمالي، د عامه پوهاوي کارپوه، انجنير صابر احمد ملکزاده، د عامه پوهاوي د ويډيويي کليپونو عمومي مدير، عطا محمد معمارزاده او د ټولنیزو پاڼو مدیر، عتیق الله مستعار پکې شامل وو، د کابل ښار د دویمې ناحيې، اووم سړک، دویم ګذر اړوند د بهارستان لوړ غره سیمې ته ولاړل او د هغو ډبرو سروې یې وکړه، چې د خلکو ژوند يې له ګواښ سره مخ کړی و.
د پېښو چارو د انسجام معين د سيمې له اوسېدونکو سره د کتنې پر مهال د هغو ډبرو د ویجاړولو د بهير په اړه خبرې وکړې چې د کابل ښار او نورو ولايتونو کې د خلکو ژوند ته ګواښ پېښوي. نوموړي مسؤلينو ته لارښوونه وکړه چې د دغو ډبرو د ویجاړولو پر مهال دې هڅه وکړي څو د سيمې اوسېدونکو ته کوم زيان ونه رسېږي، او همداراز يې خلک د يادې پروسې له کارکوونکو سره همکارۍ ته وهڅول.
همدارنګه، د خطر د مخنیوي او کمولو رئیس، حاجي اختر محمد خادم د يادې پروژې په اړه معلومات وړاندې کړل او ويې ويل، چې موږ نن د يو مسلکي، تخنيکي او تجربه لرونکي ټيم په ملتيا او د پېښو چارو د انسجام معين په مشرۍ دې سيمې ته راغلي يو، څو د هغو ډبرو له ګواښ څخه د سيمې د خوندي کولو بهير پيل کړو چې د خلکو ژوند ته خطر پېښوي. نوموړي زياته کړه، هر هغه ځای کې چې دا ډول خطرونه موجود وي، موږ د هغو د له منځه وړلو لپاره بشپړ چمتووالی لرو.
د یادونې وړ ده، چې نن ورځ په دې سیمه کې د ۳۴ ډبرو سروې وشوه او ډېر ژر به د دغو ډبرو د وېجاړولو کار پیل شي.
په همدې حال کې، د دغو سیمو اوسېدونکو وویل چې د استوګنې ګڼ شمېر کورونه او نور عامه تاسیسات د دغو ډبرو له جدي ګواښ سره مخ وو، خو اوس د هغوی د خوندي کولو بهیر پیل شوی چې د خلکو له لوري یې هرکلی او ستاینه شوې ده.
د یادونې وړ ده چې د دې ډول ډبرو د ویجاړولو بهیر په کابل ښار او د هېواد په نورو ولایتونو کې په منظم، پلان شوي او تنظیم شوي ډول دوام لري، ګران هېوادوال دې خبر وي.
نېټه:۱۴۴۷/۱۲/۲۹ هـ ق
له پېښو سره د مبارزې آمادګۍ اداره
