له پېښو سره د مبارزې آمادګۍ ملي ادارې د جینوا کال مؤسسې په همکارۍ “د بېړنیو حالاتو پر مهال بشري مرستو ته د لاسرسي” تر سرلیک لاندې دوه ورځنی سمینار په انټر کانټیننټل هوټل کې ترسره کړ
تېره ورځ دوشنبه، له پېښو سره د مبارزې آمادګۍ ملي ادارې د جنیوا کال مؤسسې په همکارۍ، ۳۰ تنه کارکوونکو ته "د بیړنیو حالاتو پر مهال بشري مرستو ته د لاسرسي" تر سرلیک لاندې دوه ورځنی سمینار ترسره کړ، په دی سمینار کې د مرکزي زون ولایتي رئیسانو په ګډون د یادې ادارې د مرکزي ریاستونو څخه هم ګڼ شمېر کارکوونکو ګډون درلود او په دې سمینار کې د بېړنیو حالاتو پر مهال د بشردوستانه مرستو ته د لاسرسي د ښه والي او خوندي چاپېریال رامنځته کولو په اړه پر موضوعاتو هراړخېز بحث وشو.
له پېښو سره د مبارزې آمادګۍ ملي ادارې په استازیتوب د میدان وردګ ولایت له پېښو سره د مبارزې آمادګۍ رئیس د د سیمینار د اهمیت په اړه خبرې وکړې او ویې ویل چي د پېښو پر مهال د بشري مرستو ته لاسرسی یو له مهمو مسایلو څخه دی، او دا ډول روزنیز پروګرامونه زموږ د ادارو د ظرفیت لوړولو لپاره ډېر ګټور دي. موږ هڅه کوو چې د جینوا کال مؤسسې په مرسته، د بیړنیو حالاتو پر مهال د بشري مرستو ویش لا اغېزمن کړو او د اړتیا وړ تدابیر ونیسو.
د جینوا کال مؤسسې د پروګرامونو مسؤل حکمت الله ځدران، د سمینار په اړه وویل چي په بېړنیو حالاتو کې بشري مرستې باید چټکې، اغېزمنې او عادلانه وي، زموږ موخه دا ده چې د اړوندو ادارو کارکوونکو ته داسې خدمتونه وړاندې کړو چې هغوی وکولای شي د بشري مرستو په تنظیم او وېش کې لا ښه مهارتونه ترلاسه کړي، د همغږۍ کچه لوړه شي، او د اړمنو خلکو اړتیاوې پر وخت وپېژندل شي.
د سیمینار په پای کې ګډونوالو د جینوا کال مؤسسې څخه ځانګړې مننه وکړه او د دا ډول روزنیزو پروګرامونو د دوام غوښتنه یې وکړه همدارنګه، ګډونوالو ټینګار وکړ چې د بشري مرستو پروسه باید لا شفافه، ګړندۍ، او عادلانه شي، ترڅو اړمن کسان وکولای شي په بېړنیو حالاتو کې پر وخت لازمي مرستې ترلاسه کړي.
نېټه:۱۴۴۶/۹/۲۵
له پېښو سره د مبارزې آمادګۍ ملي اداره
