د ننګرهار ولایت له پېښو سره د مبارزې آمادګۍ ریاست د سېلاب له امله ۲۴۸ زیانمنو کورنیو ته خوراکي مرستې ووېشلې

له پېښو سره د مبارزې آمادګۍ ملي ادارې او د ARCIO مؤسسې ترمنځ د لاسلیک شوي هوکړه لیک له مخې، چې د پروژې تمویل کوونکی یې د خوړو نړیوال پروګرام (WFP) دی، د ننګرهار ولایت له پېښو سره مبارزې آمادګۍ ریاست د دې بنسټ په مالي ملاتړ، د یاد ولایت په جلال آباد ښار او شینوار، اچین، سپین غر، بټي کوټ، پچیراګام، هسکه مینه، سرخ رود او خوګیاڼي ولسوالیو کې د سېلاب له امله ۲۴۸ زیانمنو شویو کورنیو ته خوراکي مرستې ووېشلې. 
په دې لړۍ کې، له سروې وروسته د مسؤلینو په شتون کې هرې کورنۍ ته ۱۰۰ کیلو اوړه، ۹.۱ کیلو غوړي، ۱۲.۵ کیلو دال او ۱ کیلو مالګه ووېشل شوه. 
همدارنګه، له یاد شمېر کورنیو څخه ۱۷۶ کورنیو ته د کاکو او ۲۰۳ کورنیو ته د مغزي حلوا مرستې هم ووېشل شوې. 
د یادونې وړ ده، چې دا مرستې د یوې میاشتې لپاره وې په پام کې ده، چې دې کورنیو ته به په راتلونکې میاشت کې هم په همدې ډول خوراکي مرستې ووېشل شي.

نېټه: ۱۴۴۷/۰۵/۰۵ هـ ق
له پېښو سره د مبارزې آمادګۍ ملي اداره