د کابل ولایت له پېښو سره د مبارزې آمادګۍ ریاست په فرزه ولسوالۍ کې د استنادي دیوال د جوړولو کار پیل کړ
د عالیقدر امیرالمؤمنین حفظهالله تعالی د شفقت له مخې، چې د کابل ولایت د هرې ولسوالۍ او د هېواد د ټولو ولایتونو هر یو لپاره یې یوه یوه وقایوي بېړنۍ پروژه د یو میلیون افغانیو په ارزښت منظور شوې ده او د طبیعي پېښو د خطرونو د کمولو او مخنیوي په موخه، د کابل ولایت له پېښو سره د مبارزې آمادګۍ رئیس, الحاج مولوي نجیب الله انوري, د مرکزي ادارې استازو, د فرزه ولسوالۍ ولسوال, علماوو او د مشرانو په شتون کې د فرزه ولسوالۍ په حسن خیل کلي کې د خطر د کمولو پروژه رسماً پیل شوه.
د پروژې د مراسمو په پرانست غونډه کې, د کابل ولایت له پېښو سره د مبارزې آمادګۍ رئیس, د پروژې د بنسټ ډبره کېښوده او ویې ویل، چې دا پروژه د عالیقدر امیرالمؤمنین حفظهالله تعالی د ځانګړې پاملرنې له مخې عملي کېږي، څو د طبیعي پېښو خطرونه په زیانمنو او له خطر سره مخ په سیمو کې راکم شي او له راتلونکو زیانونو او تلفاتو، په ځانګړي ډول د سیلابونو له خطرونو څخه مخنیوی وشي.
د حسنخېل کلي سیمه له دې وړاندې له پېښو سره د مبارزې آمادګۍ ملي ادارې او د کابل ولایت له پېښو سره د مبارزې آمادګۍریاست د انجنیرۍ ټیم لهخوا سروې او تثبیت شوې وه.
د استنادي دیوال دا پروژه د ۸۰ متره په اوږدوالي او ۳.۹ متره په لوړوالي ټولټال د نه سوه اووه دېرش زره او نه سوه اتیا (۹۳۷٬۹۸۰) افغانیو په لګښت پلي کېږي.
له پروژې تر بشپړېدو وروسته به د سیمې اوسېدونکي د طبیعي پېښو، په ځانګړي ډول د سیلابونو له خطره، تر ډېره خوندي پاتې شي.
د سیمې خلکو د دې پروژې له پیل څخه تود هرکلی وکړ او د اسلامي نظام د ثبات او دوام لپاره یې دعا وکړه.
نېټه: ۱۴۴۷/۰۵/۰۶ هـ ق
له پېښو سره د مبارزې آمادګۍ ملي اداره
