له پېښو سره د مبارزې آمادګۍ ملي ادارې او د اسلامي هوساینې نړیوالې (IRW) مؤسسې ترمنځ د یو سل او څلورنوي زره او اوه سوه او څلوراتیا (۱۹۴,۷۸۴) ډالرو په ارزښت د ګډو همکاریو تفاهم نامه لاسلیک سوه
نن ورځ چهار شنبه، له پېښو سره د مبارزې آمادګۍ ملي ادارې لوی رئیس الحاج ملا نور الدین ترابي د اسلامي هوساینې نړیوالې (IRW) مؤسسې له رئیس محترم محمد ذوالقرنین عباس او د هغه له مل پلاوي سره په خپل کاري دفتر کې وکتل او د ګډو همکاریو تفاهم نامه یې ورسره لاسلیک کړه.
په پیل کې ترابي صاحب راغلي پلاوي ته ښه راغلاست وویل او زیاته یې کړه، چې د ژمي موسم په رارسېدو دی نو له همدې امله هیله لرو چې له اړمنو او مستحقو کورنیو سره پر وخت او شفاف ډول مرستې ترسره سي.
وروسته د اسلامي هوساینې نړیوالې مؤسسې رئیس د خپلې تطبیقېدونکې پروژې په اړه معلومات وړاندې کړل او ددې ادارې له رهبرۍ څخه یې مننه وکړه او همدارنګه یې د مرستو پر وخت او شفاف ډول وېشلو ډاډ ورکړ.
په پای کې د دواړو لوریو ترمنځ ټولټال د یو سل او څلورنوي زره اوه سوه او څلوراتیا (۱۹۴،۷۸۴) ډالرو په ارزښت د ګډو همکاریو تفاهم نامه لاسلیک سوه، چې له مخې به یې د غور ولایت په تیورې ولسوالۍ کې ۷۴۴ مستحقو او اړمنو کورنیو ته د ژمنیو توکو د رانیولو په موخه هرې کورنۍ ته ۱۳۹۵۰ افغانۍ نغدي پيسې ووېشل سي.
نېټه: ۱۴۴۷/۵/۷ هـ ق
له پېښو سره د مبارزې آمادګۍ ملي اداره
