د کندهار ولایت په تخته پل ولسوالۍ کې له پاکستان څخه د اجباري اېستل شویو راستنېدونکو لپاره له پېښو سره د مبارزې آمادګۍ ملي ادارې اړوند د پنډغالي جوړولو کار ۹۰ سلنه بشپړ شوی دی
د عالیقدر امیرالمؤمنین حفظهالله د حکم پر بنسټ، چې له مخې یې د اجباري اېستل شویو راستنېدونکو چارو ته د رسېنې کمېسیون غړو ټولو وزیرانو ته لارښوونه شوې وه، چې په اړوندو برخو کې د هغوی لپاره اغیزمن خدمتونه وړاندې کړي، له پېښو سره د مبارزې آمادګۍ ملي ادارې ته دنده سپارل شوې، چې د راستنېدونکو د لنډمهاله هستوګنې لپاره اړینې خیمې برابرې او نصب کړي. دې ادارې د کندهار ولایت په تخته پل ولسوالۍ کې له پاکستان څخه په اجباري توګه د را اېستل شویو راستنېدونکو د لنډ مهاله هستوګنې د پنډغالي جوړولو کار پیل کړی دی چې تر اوسه یې کار ۹۰ سلنه بشپړ شوی دی.
د دې پنډغالي کار له پېښو سره د مبارزې آمادګۍ ملي ادارې د لوی رئیس، محترم الحاج ملا نورالدین ترابي په لارښوونه، د ټاکل شوي ټیم له لوري د ادارې د داخلي پلټنې آمر، محترم قاري محمد یاسین په مشرۍ پیل شوی دی. په دې پنډغالي کې ۹۰ باب خیمې او یو لوی ریبهال (ګدام) شامل دي، چې د تشناب، حمام، د کثافاتو ځای، د ټولو کوڅو جغلاچونې، عمومي سړک، د څښاک اوبو او د ټولو خیمو او اوسیدونکو لپاره د برېښنا آسانتیاوې په کې برابرې شوي دي.
د یادونې وړ ده، چې له پېښو سره د مبارزې آمادګۍ ملي ادارې د راستنېدونکو د لنډمهاله هستوګنې په موخه، د ننگرهار ولایت په تورخم فرضي کرښه، د نیمروز ولایت په پل ابریشم او د هرات په اسلامقلعه کې هم ورته پنډغالي له ټولو اساسي امکاناتو سره جوړ کړي دي.
نېټه: ۱۴۴۷/۰۵/۱۹ هـ ق
له پېښو سره د مبارزې آمادګۍ ملي اداره
