۱۲۰ بېړنۍ وقایوي پروژې پلې شوي او ۹۶۵،۲۸۹ کورنیو ته بشري مرستې وېشل شوي دي
کابل- د زمري ۹مه -۱۴۰۲
الحاج مولوي عبدالرحمن زاهد پېښو ته د رسېدو په چارو کې د دولت وزارت د مالي او اداري عمومي رییس, د حکومت د اطلاعاتو او رسنیو په مرکز کې ملت ته د دولت حساب ورکولو پروګرام کې دیوه مطبوعاتي کنفرانس پر مهال، د وزارت د یو کلنو کړنو او لاسته راوړنو په اړه معلومات وړاندې کړل.
ښاغلي زاهد په یاد مطبوعاتي کنفرانس کې وویل: د تېر کال پر مهال د ملګرو ملتو دفترونو، د ملي او نړیوالو موسسو په همکارۍ، د هېواد په کچه داستنادي دیوالونو، سېندونو مسیر پاکولو، د کانالونو او سړکونو جوړولو،بیا مېشتېدنې او ګبیوني دېوالونو، ۱۲۰ وړې وقایوي پروژې پلې شوي دي.
د مالي او اداري عمومي رییس زیاته کړه: تېر کال کې د مرستندویه هېوادونو، ملګرو ملتو دفترونو، ملي او نړیوالو موسسو، خیریه بنسټونو او اشخاصو په همکارۍ؛ د طبیعي او غیرطبیعي پېښو له امله ۹۶۵۲۸۹ زیانمنو کورنیو ته خوراکي او غیرخوراکي توکي او نغدي مرستې وېشل شوي دي. دغه راز په پکتیکا او خوست ولایتونو کې د تېرو زلزلو له امله د شهیدانو وارثینو او ټپیانو ته؛ د دولت له بودجې څخه ۱۶۰ میلیونه افغانۍ ورکړل شوي دي.
نوموړي په خپلې وینا کې ووېل: چې د هېواد په ۱۱ ولایتونو کې د پېښو پر وړاندې د زیانمنونکو سیمو ارزونه او سروې بشپړه شوي او په تېر ژمي کې په صعب العبور سیمو کې له واورې څخه د ۹۰۰ کیلومتره سړکونه او لارې پاکې شوي، له ماینونو او ناچاوده توکو څخه ۶۵ کیلومتره مربع ککړه سیمه پاک کاري او په نښه شوي همدارنګه یو میلیون کسانو ته د طبیعي پېښو او ناچاوده توکو په هکله پوهاوی ورکړل شوې او د ۳۰۰,۰۰۰ کورنیو لپاره د خوراکي، غیرخوراکي توکي، درمل او نورې مرستې راجلب او د طبیعي پېښو له امله ۲۵۲۹۳ زیانمن کورونه ترمیم شوي.
د دې ترڅنګ د ۱۴۰۲ کال لپاره، د پنځه کلن ستراتېژیک پلان وروستي کول او په ولایتونو کې د پېښو مدیریت معلوماتي ملي سیستم پراختیا د وزارت په پلان کې نیول شوې.
