له پېښو سره د مبارزې آمادګۍ ملي ادارې او د کورډ اېډ موسسې ترمنځ د ۲,۳۷۵,۸۹۸ ډالرو په ارزښت د ګډو همکاریو درې تفاهم نامې لاسلیک شوې
نن ورځ سهشنبه، له غرمې وروسته، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د کورډ اېډ مؤسسې له رئیس، سید لطیف بشردوست، د پروژې مسئول، انجنیر میرویس وردګ او د اړیکو مسئول، عبدالمنصور ابراهیمخېل سره په خپل کاري دفتر کې وکتل او د ګډو همکاریو تفاهمنامې یې ورسره لاسلیک کړې.
په دې ناسته کې، ترابي صاحب راغلي پلاوي ته د ښه راغلاست ترڅنګ وویل چې زموږ د دندې او ایماني مسئولیت له مخې، د ټولنې تر ټولو زیانمنو قشرونو ته رسېدنه زموږ له مهمو لومړیتوبونو څخه دی. له همدې امله، موږ د موسسو لپاره د ټولو اسانتیاوو برابرولو او له هغوی سره همکاریو ته ژمن یو او د هغوی چارې به ژر تر ژره ترسره کړو. همداراز، موږ له موسسو غواړو چې خپل کارونه په شفاف ډول او په چټکۍ سره ترسره کړي.
ورپسې، د کورډ اېډ مؤسسې رئیس، سید لطیف بشردوست، له پېښو سره د مبارزې آمادګۍ ملي ادارې سرپرست څخه د مننې ترڅنګ وویل چې یادې موسسې له ۲۰۰۱ کال راهیسې د روغتیا، کرنې، بشري مرستو، او پراختیایي برخو کې فعالیت کړی دی. هغه د خپلو روانو پروژو یادونه وکړه او زیاته یې کړه چې درې پروژې، چې ټولټال ارزښت یې ۲,۳۷۵,۸۹۸ امریکايي ډالر دی، د UN_OCHA دفتر او دCaritas Germany موسسې په مالي ملاتړ د ۱۱,۱۵۵ کورنیو لپاره په هرات او تخار ولایتونو کې د نغدي او غیرنغدي مرستو د وېش په توګه پلي کېږي.
لومړۍ تفاهمنامه:
د دې تفاهمنامې له مخې، د کورډ اېډ موسسه به د ۳۹۵,۴۱۲ امریکايي ډالرو په ارزښت، د تخار ولایت په ینګيقلعه، چاهآب، او چال ولسوالیو کې ۱۶۸۹ کورنیو ته، په څلورو قسطونو کې، هرې کورنۍ ته ۱۷۰ امریکايي ډالر ووېشي.
دویمه تفاهمنامه:
د دې تفاهمنامې له مخې، د کورډ اېډ موسسه به د ۴۳۷,۶۸۲ امریکايي ډالرو په ارزښت، د هرات ولایت د فارسي ولسوالۍ ۱۰۳۰ کورنیو هرې یوې ته ۲۷۴ امریکايي ډالر او همداراز، پنځه تختې (یوه دوهکسیزه او څلور یوکسیزې) کمپلې د ۵۷ ډالرو په ارزښټ ووېشي.
درېیمه تفاهمنامه:
د دې تفاهمنامې له مخې، د کورډ اېډ موسسه به د ۱,۵۴۲,۸۰۴ ډالرو په ارزښت، د هرات ولایت رباط سنگي، گذره، او پشتون زرغون ولسوالیو ۲۳۱۵ کورنیو هرې یوې ته ۱۶۱ امریکايي ډالر، ۳۰۰۰ کورنیو ته د ژمنیو جامو د پېرلو لپاره هرې کورنۍ ته ۷۷.۵۰ ډالر، ۵۰۰ کورنیو ته د باران او واورې پر وړاندې د کورونو د خونديتوب لپاره هرې کورنۍ ته ۳۴۰ ډالر، ۳۳۹ کورنیو ته د کور کرایې ورکولو لپاره هرې کورنۍ ته ۱۷۹ ډالر، ۵۰۰ کورنیو ته د روغتیایي توکو پېرلو لپاره هرې کورنۍ ته ۱۱۵ ډالر، او ۱۷۲۲ کورنیو ته د روغتیایي توکو پېرلو لپاره هرې کورنۍ ته ۲۰ ډالر ووېشي.همداراز، د یادو ولسوالیو په کچه ۲۰۰ تشنابونه به هم بیا ورغول شي.
نېټه:۱۴۴۶/۸/۲۷
له پېښو سره د مبارزې آمادګۍ ملي اداره
