د سېلابي رسوباتو څخه د رخه ولسوالۍ د پیاوشت کلي د ښوونځي د پاکولو چارې ترسره شوې
د پنجشیر ولایت له پېښو سره د مبارزې آمادګۍ ریاست د سیمې د اوسېدونکو په همکاري او د ولایت مقام په همغږۍ، د رخه ولسوالۍ د پیاوشت کلي د هلکانو د ښوونځي انګړ او ټولګي له هغو رسوباتو او خټو پاک کړل چې د وروستیو سېلابونو له امله ډک شوي وو.
تېر سېلابونه د دې ښوونځي د زده کړو بهیر، د شاګردانو د تګ راتګ او د ښوونځي له انګړ څخه په عمومي کارونې کې جدي ستونزې رامنځته کړې وې. د دې فعالیت په ترسره کولو سره، د ښوونځي تعلیمي چاپېریال بېرته عادي حالت ته ستون شوی او د شاګردانو لپاره د بې له ځنډه زده کړو زمینه برابره شوې ده.
دا اقدام د پنجشیر ولایت له پېښو سره د مبارزې د آمادګۍ ریاست، د سیمهییزو خلکو او نورو دولتي ادارو د همکارۍ او یووالي ښکاره بېلګه ده چې د طبیعي پېښو د ګواښونو د کمولو او د ښوونې او روزنې د بهیر د ملاتړ په موخه ترسره شوی دی.
نېټه: ۱۴۴۷/۰۲/۰۲ هـ ق
له پېښو سره د مبارزې آمادګۍ ملي اداره
