په فراه ولایت کې د يو استنادي ديوال جوړولو کار بشپړ او ګټې اخیستنې ته وسپارل شو
د عالیقدر امیرالمومنین حفظ الله د حکم پر بنسټ، چې د طبیعي پېښو د خطرونو د کمولو په موخه په هر ولایت کې د یوې کوچنۍ بېړنۍ وقایوي پروژې د پلي کېدو لپاره یې د یو میلیون (۱,۰۰۰,۰۰۰) افغانیو بودجه منظوره کړې او دا وقایوي پروژې له پېښو سره د مبارزې آمادګۍ ملي ادارې له لوري تمویل او پلي کېږي.
په همدې لړ کې، د فراه ولایت له پيښو سره د مبارزې آمادګۍ رياست، د یاد ولایت د مرکز فراه ښار په ۶ ناحیه کې هوايي ډګر ته څېرمه د څه کم یو میلیون افغانیو په لګښت د ۱۱۸ متره په اوږدوالي او ۳ متره په لوړوالي د استنادي دېوال جوړولو کار بشپړ او ګټې اخیستنې ته وسپاره، د دې پروژې د پلي کېدو په بهیر کې د لسګونو کسانو لپاره د کار زمینه برابره شوې وه او د پروژې په بشپړېدو سره د سېلابونو د خطرونو او زیانونو څخه د سیمې د اوسېدونکو ځان او مال خوندي پاتې شول.
ورته مهال د سیمې اوسیدونکو دغه پروژې د خلکو د ځان او مال ژغورنه او ساتنه وبلله او له اړونده مسؤلینو څخه یې مننه او قدرداني وکړه.
نېټه: ۱۴۴۷/۴/۰۵ هـ ق
له پېښو سره د مبارزې آمادګۍ ملي اداره
