له پېښو سره د مبارزې آمادګۍ ملي ادارې لوی رئیس د زابل ولایت له پېښو سره د مبارزې آمادګۍ ریاست څخه لیدنه وکړه
له پېښو سره د مبارزې آمادګۍ ملي ادارې لوی رئیس محترم الحاج ملا نورالدین ترابي، د خپل سفر په ترڅ کې د زابل ولایت له پېښو سره د مبارزې آمادګۍ ریاست څخه لیدنه وکړه او د یاد ریاست له مسئولینو او کارکوونکو سره یې وکتل او له هغوی سره یې خبرې وکړې.
په دې لیدنه کې محترم ترابي صاحب د کارکوونکو له هڅو او فعالیتونو څخه قدردانی وکړ او د طبیعي پېښو له امله د زیانمنو شویو خلکو د اړتیاوو ته پر وخت د رسېدنې او غوره خدمتونو د وړاندې کولو پر اهمیت یې ټینګار وکړ. همدارنګه د کارکوونکو د هڅونې او لا زیاتې انګېزې لپاره یې هغوی ته نغدي مرستې هم ورکړې.
محترم ترابي صاحب د ریاست له ګودام څخه هم لیدنه وکړه او د بشري مرستو د ساتنې او زیانمنو شویو کسانو ته یې د هغو د وېش په برخه کې پر روڼتیا ټینګار وکړ.
له پېښو سره د مبارزې آمادګۍ ملي ادارې لوی رئیس وروسته د هغې ځمکې څخه هم لیدنه وکړه، چې د زابل ولایت له پېښو سره د مبارزې آمادګۍ ریاست لپاره د اداري ودانۍ د جوړولو لپاره ځانګړې شوې ده، او د ودانیزو چارو د پیل او د کارکوونکو لپاره د لا ښو آسانتیاوو د برابرولو په موخه یې اړینې لارښوونې وکړې.
نېټه: ۱۴۴۷/۰۹/۲۷ هـ ق
له پېښو سره د مبارزې آمادګۍ ملي اداره
