د غور ولایت په ساغر ولسوالۍ کې د اوبو رسونې شبکې د پروژې د پلي کېدو له بهیر څخه څارنه وشوه
د غور ولایت له پېښو سره د مبارزې آمادګۍ ریاست، د عامه المنفعه پروژو د پلي کېدو د کیفیت د څارنې په موخه، د یاد ولایت د ساغر ولسوالۍ د ده قاضي کلي د اوبو رسونې شبکې د پروژې له روانو چارو څخه تخنیکي لیدنه او څارنه ترسره کړه. دغه پروژه د AAH مؤسسې له لوري د BMZ په مالي ملاتړ پلې کېږي.
د دې څارنې پر مهال، څارونکي پلاوي د پروژې بېلابېلې برخې، لکه د اوبو د لېږد لارې، د پایپونو د نصب څرنګوالی، د پایپونو لپاره د کیندل شوو خندقونو ژوروالی او د ترسره کېدونکو چارو عمومي کیفیت له تخنیکي پلوه وارزاوه.
د ترسره شوې ارزونې پر بنسټ، د پروژې د پلي کېدو په بهیر کې یو شمېر تخنیکي نیمګړتیاوې په لاندې ډول ولیدل شوې:
• په ځینو برخو کې د پایپونو د ښخولو لپاره د کیندل شوو خندقونو ژوروالی له تخنیکي معیارونو څخه کم و.
• په ځینو برخو کې پایپونه په مناسبه توګه په نرمه خاوره نه وو پوښل شوي او نه هم ټینګ شوي وو.
• د شبکې ځینې نښلونکې برخې او نورې برخې د پروژې د تخنیکي مشخصاتو له مخې اصلاح او بشپړېدو ته اړتیا لري.
څارونکي پلاوي یادې نیمګړتیاوې په رسمي ډول د پروژې د پلي کوونکې مؤسسې له تخنیکي مسؤلینو سره شریکې کړې او هغوی ته یې لارښوونه وکړه چې دغه ستونزې د امکان تر حده په لنډ وخت کې د تخنیکي معیارونو سره سمې اصلاح کړي.
په پای کې، د غور ولایت له پېښو سره د مبارزې آمادګۍ ریاست ټینګار وکړ چې د خطرونو د کمولو او بنسټیزو پروژو د پلي کېدو څارنه به په دوامداره توګه روانه وي، څو ټولې پروژې په لوړ کیفیت پلې او خلکو ته خوندي او دوامدار خدمات وړاندې شي.
