د پنجشیر ولایت د پیاوشت د کلیو او د زمانکور سیند له وقایوي فعالیتونو څخه څارنه وشوه
د پنجشیر ولایت له پېښو سره د مبارزې ولایتي کمیسیون د څارنې ټیم د دې ولایت په دوو سیمو کې د وقایوي فعالیتونو له بهیر څخه لیدنه او ارزونه وکړه. د رخه ولسوالۍ په پیاوشت کلي کې د نښلوونکي سړک د تحکیم بهیر په حضوري ډول وڅارل شو. له پېښو سره د مبارزې آمادګۍ ریاست اړین مواد، لکه د ګبیون بکسونه چمتو کړي او سیمې ته یې انتقال کړي دي. د تثبیت او د ګبیونونو د نصبولو عملیات د ځایي خلکو په مرسته د پلان او تخنیکي معیارونو سره سم روان دي.
د عنابه ولسوالۍ په زمانکور کلي کې د اوبو د مناسب جریان لپاره د لارې برابرولو او د اوبو د لوړېدو د مخنیوي په موخه له پېښو سره د مبارزې آمادګۍ ریاست له لوري د ځایي خلکو په همکارۍ د یو عراده اسکواټور په کارلو سره د سیند د پاکولو بهیر ترسره شو. د زیاتو خاورو او اضافي موادو لویه برخه له لارې لیرې شوې ده.
په پای کې، د تخنیکي معیارونو د رعایت، د خوندیتوب اصول او د کار د چټکتیا په برخه کې ساحوي مسؤلینو ته اړین لارښود ورکړل شول تر څو پروژې په ښه کیفیت او په ټاکل شوي وخت کې بشپړې شي.
نېټه:۱۴۴۷/۶/۱۸ هـ ق
له پېښو سره د مبارزې آمادګۍ ملي اداره
