له پېښو سره د مبارزې آمادګۍ ملي ادارې او د اسلامي هوساینې نړېوالې مؤسسې ترمنځ د ۳٫۴۴۱٫۳۴۶ ډالرو په ارزښت د هیواد په ختیځ زون کې د ۶۰ کوچنیو بنسټیزو پروژو د پلي کولو لپاره د ګډو همکاریو تفاهمنامه لاسلیک شوه
نن سهار یکشنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي په خپل کاري دفتر کې د اسلامي هوساینې نړېوالې مؤسسې له رئیس محمد ذوالقرنین عباس سره وکتل او د هیواد په ختیځ زون کې یی د استنادي دیوالونو او چیکډمونو جوړولو په برخه کې د ګډو همکاریو تفاهمنامه ورسره لاسلیک کړه.
محترم ترابي صاحب د مؤسسې رئیس ته د ښه راغلاست ویلو ترڅنګ هغوی د خلکو د خدمت په برخه کې زیات فعالیتونو ترسره کولو ته راوبلل او د یادې پروژې په اړه یې ورڅخه معلومات واورېدل.
په ورته وخت کې، محمد ذوالقرنین عباس، د اسلامي هوساینې نړېوالې مؤسسې رئیس د دې ادارې له سرپرست څخه د مؤسسو سره د همکارۍ له امله مننه وکړه او د یادې پروژې په اړه یې تفصیلي معلومات وړاندې کړل. نوموړي زیاته کړه چې مؤسسه به په راتلونکي کې د بنسټیزو پروګرامونو په پلي کولو کې لا زیاته هڅه وکړي.
د یادونې وړ ده چې د دې تفاهمنامې له مخې، یاده مؤسسه به د ۳٫۴۴۱٫۳۴۶ ډالرو په مجموعي ارزښت په لغمان او کونړ ولایتونو کې ۶۰ کوچنۍ او متوسطه د خطر کمولو پروژې چې استنادي دیوالونه، چیکډمونه، یا د سیمو او خلکو اړتیاوو ته په کتو د سروې له مخې مشخصې پلي کړي.
همدارنګه، د دې پروژې له مخې به د لغمان ولایت په علیشنګ او علینگار ولسوالیو او د کونړ ولایت د سرکانو او نرنګ ولسوالیو په ۶۰ کلیو کې د خطر کمولو کمیټې د جوړولو ترڅنګ د ظرفیت لوړونې ورکشاپونه به ترسره کړي او دې کمیټو ته به د خطر کمولو وسایل وویشي.
نیټه: ۱۴۴۶/۶/۱۳
له پیښو سره د مبارزې آمادګۍ ملي اداره
