له پېښو سره د مبارزې آمادګۍ ملي ادارې او د اړمنو خلګو نړیوالې مؤسسې ترمنځ د ۲۶۶,۷۸۶ ډالرو په ارزښت د ګډو همکاريو تفاهم نامه لاسلیک شوه
نن ورځ سې شنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي صاحب د اړمنو خلګو نړیوالې مؤسسې د مرستیال احسان الله نعیم سره وکتل.
ترابي صاحب، د یادې مؤسسې مرستیال ته د ښه راغلاست ترڅنګ ووېل، چې په ډېرو ولایتونو کي زیانمنې کورنۍ شتون لري چې مرستو ته جدي اړتیا لري او باید ټولې مؤسسې او سازمانونه خپلې مرستې ورسره وکړي ترڅو د روژې په مبارکه میاشت کې زیانمنې کورنۍ د مرستو څخه برخمنې شي.
همدارنګه ترابي صاحب د یادې موسسې له پلاوي څخه مننه وکړه، چې تل یې د زیانمنو کورنیو سره بېلابېلې مرستې کړي او باید خپلې مرستې د افغان ولس سره جاري وساتي او د مرستو رسولو د بهیر پر چټکتیا یې ټینګار وکړ.
ورته مهال، د اړمنو خلګو نړیوالې مؤسسې مرستیال احسان الله نعیم د یادې ادارې د سرپرست څخه ځانګړې مننه وکړه، چې پر وخت یې کارونه ترسره شوي دي او په کارو کې یې چټکتیا رامنځته کړې ده او ژمنه یې وکړه چې ډېر ژر به مرستې تر اړمنو کورنیو ورسوو.
د یادونې وړ ده، چې یاده تفاهم نامه چې د ۲۶۶,۷۸۶ ډالرو په ارزښت لاسلیک شوه، د کابل او میدان وردګ ولایتونو کې به ۲,۶۷۶ اړمنو کورنیو ته نغدي مرستي ویشل کیږي، چي ۱۰۷۱ کورنیو ته د کابل ولایت په ده سبز ولسوالۍ کې او ۱۶۰۵ کورنیو ته د میدان وردګ ولایت په چک ولسوالۍ کې هرې کورنۍ ته به ۷۴ آمریکایي ډالره ورکړل شي.
نیټه: ۱۴۴۶/۹/۱۸ هــ ق
له پیښو سره دمبارزې آمادګۍ ملي اداره
