له پېښو سره د مبارزې آمادګۍ ملي ادارې او د درمان مؤسیسې تر منځ د ګډو همکاریو تفاهم نامه لاسلیک شوه
نن ورځ یکشنبه، له پېښو سره د مبارزې آمادګۍ ملي ادارې سرپرست الحاج ملا نورالدین ترابي په خپل کاري دفتر کې د درمان مؤسسې د پروژو له مدیر محمد صابر علي خېل سره وکتل او د دواړو ادارو ترمنځ د ګډو همکاریو تفاهم نامه یې ورسره لاسلیک کړه.
محترم ترابي صاحب یاده مؤسسه د ژمي په را رسېدو سره وهڅوله تر څو له هر څه مخکې خپلې ژمنۍ مرستې ترسره کړي، تر څو خلک ورڅخه په خپل وخت کی ګټه پورته کړي. نوموړي زیاته کړه چې ستاسو کارونه به له پېښو سره د مبارزې آمادګۍ ملي ادارې سره په وخت پای ته ورسېږي او همدارنګه زموږ له تاسو څخه دا هیله ده چې زیاته بودجه د لا زیاتو پروژو د پیل او د خلکو د خدمت لپاره راجلب کړئ.
په ورته وخت کې د یادې مؤسسې د پروژو مدیر محمد صابر علي خېل د یادې ادارې سرپرست او د کار کوونکو کړنې په خپل وخت تر سره کېدو له امله وستایلې او له دوی څخه یې مننه وکړه، نوموړي وویل چی زه ستاسو له هغو همکاریو څخه خبر یم چې له مؤسساتو سره یې کوی، نو له دې امله له تاسو سره یو ځای کار کولو ته لېواله یم.
د یادونې وړ ده چې د یادې تفاهمنامې له مخې، د ۶۹,۵۰۰ ډالرو په مجموعي ارزښت د ژمي له سړې هوا څخه د خوندیتوب لپاره ۱۶۰۰ کورنیو ته غیر خوراکي مرستې وېشل کېږي. په دې مرسته کې به ۱۰۰۰ کورنیو ته په کابل کې او ۶۰۰ کورنیو ته په ننګرهار کې، هرې کورنۍ ته دوه کسیزه دوه کمپلې او د ماشومانو دوه جمپرونه ووېشل شي.
نیټه: ۱۴۴۶/۶/۱۳
له پیښو سره د مبارزې آمادګۍ ملي اداره
