له پېښو سره د مبارزې آمادګۍ ملي ادارې او د ماشومانو د ملاتړ مؤسسې ترمنځ ټولټال د اته سوه او یو څلوېښت زره او یو سل او دوه ویشت (۸۴۱,۱۲۲) ډالرو په ارزښت د ګډو همکاریو تفاهم نامه لاسليک شوه
نن يکشنبه له غرمې مخکې، له پېښو سره د مبارزې آمادګۍ ملي ادارې لوی رئيس، محترم الحاج ملا نورالدين ترابي، په خپل کاري دفتر کې د ماشومانو د ملاتړ مؤسسې له مرستيال محمود پاچا سره وکتل او د ګډو همکاريو تفاهمنامه يې ورسره لاسليک کړه.
په دې ناسته کې ترابي صاحب وويل، له دې امله چې د ننګرهار، کونړ، خوست، پکتيا او پکتيکا ولايتونو کې د وروستيو بريدونو له امله د بېځايه شويو کسانو شمېر زيات شوی، نو زموږ اصلي تمرکز اوس د هغوی د حالت او معيشت ته پر رسېدنې دی او له مؤسسو غواړو چې په دې شرايطو کې د بېځايه شويو تر څنګ ودرېږي او لازمې مرستې ورسره وکړي. هغه همدارنګه د يادې مؤسسې د ترسره شويو فعاليتونو راپور ترلاسه کولو وروسته د تفاهمنامې د موادو پر وخت او په شفاف ډول د پلي کېدو ټينګار وکړ.
په همدې حال کې د ماشومانو د ملاتړ مؤسسې مرستيال د يادې تفاهمنامې په اړه معلومات وړاندې کړل او په ننګرهار او کونړ ولايتونو کې د خپلو ترسره شويو فعاليتونو لنډ راپور يې شريک کړ. د هغه په وينا، په ننګرهار ولايت کې د ۱۱۲ بېځايه شويو کورنيو سره نغدي مرسته شوې او په کونړ ولايت کې ۹۹ بېځايه شويو کورنيو ته غيرخوراکي مرستندويه بستې د يادو ولايتونو له پېښو سره د مبارزې آمادګۍ رياستونو په همغږۍ وېشل شوې دي.
د يادونې وړ ده چې د ناستې په پای کې د دواړو لورو ترمنځ ټولټال د اته سوه او یو څلوېښت زره او یو سل او دوه ویشت (۸۴۱,۱۲۲) ډالرو په ارزښت د ګډو همکاریو تفاهم نامه لاسليک شوه، د دې تفاهمنامې له مخې به په وچکالۍ ځپلو سيمو کې، د جوزجان ولايت د شبرغان ښار او قرقين ولسوالۍ، د سرپل ولايت د سرپل ښار او صياد ولسوالۍ او د فارياب ولايت د پښتونکوټ ولسوالۍ کې ۱۳ د اوبو شبکې جوړې او ۱۴ نورې تخريب شوې شبکې په اساسي ډول ترميم شي. همدارنګه د وچکالۍ له امله زیانمنو ۳۱۳۱ کورنيو ته به د حفظ الصحې بستې ووېشل شي او د سيمې خلکو ته به د حفظ الصحې او په سمه توګه د اوبو شبکو د کارولو په اړه عامه پوهاوی ورکړل شي.
نېټه: ۱۴۴۷/۰۹/۱۹ هـ ق
له پېښو سره د مبارزې آمادګۍ ملي اداره
