له پېښو سره د مبارزې آمادګۍ ملي ادارې او د CRS موسسې د ۲۰۰,۰۰۰ ډالرو په ارزښت د ګدو همکاریو تفاهم نامه لاسلیک کړه
نن سهار د یکشنبې په ورځ، له پېښو سره د مبارزې آمادګۍ ملي ادارې سرپرست، الحاج ملا نورالدین ترابي، د CRS مؤسسې د کابل د دفتر له مسؤل، احمد فرید صمیم سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
ترابي صاحب، د دې مؤسسې مسؤل ته د ښه راغلاست ویلو ترڅنګ زیاته کړه، چې په ډېرو ولایتونو کې داسې زیانمنې کورنۍ شته چې جدي مرستو ته اړتیا لري او باید ټولې مرستندویه مؤسسې او سازمانونه همکاري وکړي ترڅو زیانمنو کورنیو ته مرستې ورسیږي.
همداراز ترابي صاحب، د CRS له مؤسسې څخه مننه وکړه چې تل یې زیانمنو کورنیو ته بېلابېلې مرستې رسولې دي، او ټینګار یې وکړ چې مؤسسې باید د افغانستان له خلکو سره خپلو مرستو ته دوام ورکړي او د مرستو د رسولو بهیر ګړندی کړي.
په ورته وخت کې، د CRS مؤسسې د کابل د دفتر مسؤل، احمد فرید صمیم، له پېښو سره د مبارزې آمادګۍ ملي ادارې له سرپرست څخه ځانګړې مننه وکړه چې د مؤسسو کارونه پر وخت ترسره کوي او په کارونو کې یې چټکتیا رامنځته کړې. نوموړي ژمنه وکړه چې ژر تر ژره به زیانمنو کورنیو ته مرستې ووېشل شي.
د یادونې وړ ده، چې د دې تفاهمنامې له مخې، ټولټال د ۲۰۰,۰۰۰ ډالرو په ارزښت، د هرات ولایت د غوریان ولسوالۍ ۱۶۰۰ هغو کورنیو ته چې د وچکالۍ له امله زیانمنې شوي، هرې یوې ته به ۷۰ ډالر نغدي مرسته او ۳۵۰ نورو کورنیو هرې یوې ته به د ۶۸ ډالرو په ارزښت، ۱۰۵ کیلو د غنمو اصلاحشوي تخمونه ووېشل شي.
نېټه: ۱۴۴۶/۱۱/۲۰ هـ ق
له پېښو سره د مبارزې آمادګۍ ملي اداره
