له پېښو سره د مبارزې آمادګۍ ملي ادارې او ورلډ ویژن نړیوالې موسسې ترمنځ د ۲۰۰,۱۶۳ ډالرو په ارزښت د ګډو همکاریو تفاهم نامه لاسلیک شوه

نن ورځ پنج شنبه، له غرمې مخکې له پېښو سره د مبارزې آمادګۍ ملي ادارې سرپرست الحاج ملا نورالدین ترابي د ورلډ ویژن نړیوالې موسسې د پروګرامونو له رییس لیونارد ایسن سره وکتل او د ګډو همکاریو تفاهم نامه یې ورسره لاسلیک کړه
په پیل کې، ترابي صاحب د یادې موسسې پلاوي ته ښه راغلاست وویل او د بشردوستانه پروژو په چټک او شفاف تطبيق يې ټينګار وکړ او ويې ويل چې د هېواد خلک زياتو مرستو ته اړتيا لري او موسسې بايد له خپلو ډونرانو څخه د لا زياتو مرستو په ترلاسه کولو کې زياتې هڅې وکړي.
په عین حال کې، د يادې موسسې د پروګرامونو رییس ليونارد ايسن د يادې پروژې په اړه معلومات وړاندې کړل او ويې ويل، په پام کې نیول شوې ده چې دغه پروګرام به د فارياب ولايت په قيصار ولسوالۍ کې پلی شي، چې له امله به يې هغه کسانو ته چې د کار کولو وړتیا ولري د عامه ګټو د کارونو په بدل کې به نغدي مرستې ورکړل شي او هغه کسان چې د کار کولو وړتیا نه لري، نغدي مرستې به ورته ترسره کېږي.
د یادولو وړ ده، چې د دغې تفاهم نامې له مخې به د کار کولو توان لرونکو کسانو او د کار توان نه لرونکو کسانو ته د ۲۰۰,۱۶۳ ډالرو په اندازه نغدي مرستې ورکړل شي، په دې ډول چې د قیصار ولسوالۍ ۲۷۵ اړمنو کورنیو ته په پنځو دورو کې، هرې کورنۍ ته ۲۱۴ ډالر او په همدې ولسوالۍ کې به ۲۷۲ کورنیو ته د درېیو میاشتو په موده کې به د عامه ګټو د کار په بدل کې ٢٥٦.٨ ډالره ورکړل شي.
د يادونې وړ ده، چې په دې پروژه کې د کارګرانو لپاره د کاري وسايلو برابرول هم شامل دي.

نیټه: ۱۴۴۶/۱۰/۱۲
له پېښو سره د مبارزې آمادګۍ ملي اداره