په کابل کې د مرستو د رسونې دوام؛  له پېښو سره د مبارزې آمادګۍ ملي ادارې سرپرست د ۳۲۰ زیانمنو کورنیو لپاره د خوراکي او غیر خوراکي مرستو د وېش لړۍ پیل کړه

نن سهار، له پېښو سره د مبارزې آمادګۍ ملي ادارې سرپرست محترم الحاج ملا نورالدین ترابي، د کابل والي الحاج ملا امین الله عبید، د کابل ولایت له پېښو سره د مبارزې آمادګۍ رئیس محترم مولوي نجیب الله انوری او د رسنیو استازو په شتون کې، په کابل ولایت کې د بېلابېلو پیښو له امله ۳۲۰ زیانمنو کورنیو لپاره د خوراکي او غیر خوراکي مرستو د وېش لړۍ پیل کړه.
محترم ترابي صاحب د دغو مرستو د وېش پر مهال، د تېرې ورځي مرستو ته په اشارې سره چې په کابل کې ۵۰۰ کورنیو ته وېشل شوې وې، ټینګار وکړ چې دا لړۍ به تر خپل وس پورې دوام ومومي. نوموړي همدارنګه له مرستندویه ادارو څخه غوښتنه وکړه چې خپل ملاتړ زیات کړي او زیربنایي پروژو ته ډېره پاملرنه وکړي.
د محترم ترابي صاحب په وینا، نن په کابل کې ۳۲۰ هرې زیانمنې کورنۍ ته ۵۰ کیلو اوړه، ۲۵ کیلو وریجې، ۱۰ کیلو بوره، ۴۰۰ ګرامه کارنفلور، نیم کیلو مالګه، او د یونیسف موسیسی لخوا یوه کارتن چې دماشومانو لپاره څوارلس قلمه ژمنی  توکي پکې شامل دي، ووېشل شول.
همدارنګه، د کابل والي الحاج ملا امین الله عبید څرګنده کړه چې اسلامي امارت او له پېښو سره د مبارزې آمادګۍ ملي اداره تل د ولس ترڅنګ ولاړ دي او د دې نښه د نن ورځې مرستې دي چې زیانمنو کورنیو ته وېشل کېږي.
د یادونې وړ ده چې له دغو مرستو څخه  ګټه اخیستونکو مننه وکړه، خو ویې وېل چې دا بسنه نکوي او د نورو مرستو غوښتنه یې هم وکړه.

نیټه: ۱۴۴۶/۵/۴
له پیښو سره د مبارزې آمادګۍ ملي اداره