په کابل کې مېشت د ترکیې جمهوریت سفیر: ترکیه په افغانستان کې د پېښو له امله زیانمن شویو ته د بشري مرستو د همکاري لپاره چمتو دې
کابل- د کب ۱۹مه ۱۴۰۰
محترم الحاج ملا محمد عباس آخند پېښو ته د رسېدو په چارو کې د دولت وزیر، نن سهار له جهاد ارګینای په کابل کې مېشت د ترکیې جمهوریت سفیر او فرید احمد ضیا په کابل کې مېشت د ترکیې د هلال احمر استازولۍ رییس سره د ترکیې هیواد د بشري مرستو د همکاري لپاره د چمتووالي په اړه لیدنه او خبرې وکړې.
پېښو ته د رسېدو په چارو کې د دولت وزیر د ښه راغلاست ترڅنګ د افغانستان او ترکیې پر تاریخي اړیکو په خبرو سره وویل: پېښو ته د رسېدو په چارو کې د دولت وزارت یو غیر سیاسي سازمان دی چې فعالیتونه یي زیانمنونکو او زیانمن شویو ته رسېدنه ده.
محترم الحاج ملا محمد عباس آخند په افغانستان کې د بشري وضعیت په اړه په خبرو سره زیاته کړه چې طبیعي پېښې لکه: سیلابونه، زلزله، وچکالۍ و.... د خلکو د زیانمنتوب کچه لوړه کړې ده.
پېښو ته د رسېدو په چارو کې د دولت وزیر د دواړو ملګرو هیوادونو ترمینځ د ګډ کلتور او دین په اړه یادولو سره د ترکیې له سفیر څخه د پېښو له امله زیانمن شویو ته د بشري مرستو، د دغه وزارت د کارکونکو لپاره د ظرفیت لوړولو پروګرامونو ترسره کولو او د معیاری ګدامونو د جوړولو غوښتونکۍ شو.
ورته مهال جهاد ارګینای په کابل کې مېشت د ترکیې جمهوریت سفیر د مننې ترڅنګ د افغانستان او ترکیه د تاریخي ملګرتیا په یادولو سره وویل: په تېر وخت کې افغانانو په همداسې وخت کې د ترکیې له خلکو سره مرسته کړي وه او اوس وخت را رسېدلې ترڅو د افغانستان خلک یوازې پرېنږدو.
په کابل کې مېشت د ترکیې سفیر په تېرو کلونو کې د خپل هیواد د کړنو په یادولو سره وویل: اوس ترکیه د نورو کړنو ترڅنګ په افغانستان کې د پېښو څخه زیانمن شویو ته د بشري مرستو په برخه کې د همکاري لپاره چمتو دی.
وروسته فرید احمد ضیا په کابل کې مېشت د ترکیې د هلال احمر د استازولۍ رییس د بشري مرستو په برخه کې د خپلو کړنو په اړه یادونه وکړه او پېښو ته د رسېدو په چارو کې د دولت وزیر سره یې د سیلابونو او وچکالۍ له امله زیانمن شویو ته د بشري مرستو رسولو ژمنه وکړه.
په پای کې دواړو خواوو پر ملګرتیا، همغږي او معلوماتو د شریکولو په اړه پر همکاري خبرې وکړې او پر دوامداره همکاریو یې ټینګار وکړ.
