د سمنګان ولایت له پېښو سره د مبارزې آمادګۍ ریاست په خلم ولسوالۍ کې د یوې سېلابي لارې د پاکولو چارې پیل کړې
له پېښو سره د مبارزې آمادګۍ ملي ادارې د لوی رئیس؛ محترم الحاج ملا نورالدین ترابي د لارښوونې له مخې، چې د دې ادارې ټولو ولایتي ریاستونو ته یې لارښوونه کړې وه ترڅو د بېلابېلو ولسوالیو د سېلابونو لارې چې له رسوباتو څخه ډکې شوې دي پاکې کړي، د سمنګان ولایت له پېښو سره د مبارزې آمادګۍ ریاست په خلم ولسوالۍ کې د یو خوړ د پاکولو چارې پیل کړې.
دا د سېلاب لار د ۴۵۰ متره اوږدوالي او ۶ متره سور په درلودلو سره له رسوباتو څخه ډکه شوې وه، چې د پاکولو چارې یې له پېښو سره د مبارزې آمادګۍ ریاست د رئیس؛ محترم احسان الله احسان، د خلم د ولسوال او سیمه ییزو اوسېدونکو په شتون کې پیل شوې. د دې پروژې په بشپړېدو سره به د سېلابي لارې د شاوخوا سیمې د سېلاب له خطر څخه بچ او د خلکو ځانونه او مالونه به د سېلابونو له احتمالي زیانونو څخه وژغورل شي.
نېټه: ۱۴۴۷/۵/۲۷ هـ ق
له پېښو سره د مبارزې آمادګۍ ملي اداره
