د مالي او اداري ریاست پلاوی د مالي او اداري چارو د څارنې او لارښوودنې لپاره د هېواد سویل او سویل لویدیځ ولایتونو ته ولېږل شو
له پېښو سره د مبارزې آمادګۍ ملي ادارې د سرپرست په لارښوونه, د مرکزي ادارې دوه کسیزه پلاوی، چې د مالي او اداري ریاست د بودجې عمومي مدیر او د ګدامونو عمومي مدیر پکې شامل دي، د هېواد سویل او سویل لویدیځ ولایتونو ته ولېږل شو، ترڅو د یادو ولایتونو له پېښو سره د مبارزې آمادګۍ ریاستونو مالي او اداري چارې وڅاري او لازمې لارښوودنې وکړي.
یاد پلاوي تر دې دمه د زابل، ارزګان، کندهار او هلمند له ولایتونو څخه لیدنه کړې او ویلي یې دي، چې دغه سفر د اسلامي امارت د عالي مقام، د ریاست الوزراء مقام، د مالیې وزارت او د مرکزي ادارې د مشرتابه د احکامو، لارښوونو او مقرراتو د پلي کېدو په موخه ترسره شوی دی.
د دې مأموریت اساسي موخې، د مالي او حسابدارۍ چارو د څارنې، د اداري پروسو ښهوالي، د دفترونو تنظیم، د لازمو معیارونو سره سم د خوراکي او غیرخوراکي توکو د ساتنې په موخه د ګودامونو مدیریت، او د دغو توکو د لېږد او ترلاسه کولو د بهیر ارزول دی.
د یادونې وړ ده، چې دغه بهیر به د هېواد په ټولو ولایتونو کې پلي شي، او هممهاله، یو بل ورته پلاوی د شمال او شمال ختیځ زون لپاره هم ټاکل شوی دی.
نیټه: ۱۴۴۶/۹/۰۴
له پېښو سره د مبارزې آمادګۍ ملي اداره
