د پروان ولایت د سیاه ګرد ولسوالۍ په میرخان خیل کلي کې د پلي تګ پل د جوړولو د کار له لړۍ څخه څارنه وشوه
د پروژې د کمیت او کیفیت څخه د ډاډ ترلاسه کولو په موخه، د څارنې پلاوي د پروان ولایت له پېښو سره د مبارزې آمادګۍ د رئیس، محترم مولوي عبدالعلیم افضلي په مشرۍ، د یاد ولایت د سیاهګرد ولسوالۍ د فندقستان د سردرې په میرخانخېل کلي ته سفر وکړ او د پلي تګ پل د جوړولو د پروژې د کار له بهیر څخه یې څارنه وکړه.
د دې څارنې په ترڅ کې ډاډ ترلاسه شو، چې د یاد پل د بنسټونو د جوړولو کار د نقشې، تخنیکي اسنادو او ورکړل شویو لارښوونو سره سم، په ښه کیفیت سره د بشپړېدو په حال کې دی، او ټاکل شوې ده، چې په نږدې راتلونکي کې به د پل د اوسپنیزو ګادرونو د نصبولو پروسه هم پیل شي.
همدارنګه، د څارنې پلاوي د کار د بهیر د لا ښه والي او د ټاکل شویو معیارونو د دقیق تطبیق په موخه، قراردادي شرکت ته لازمې لارښوونې وړاندې کړې.
د یادونې وړ ده، چې د پاتې کارونو له بشپړېدو سره به دا پروژه ډېر ژر تکمیل او ګټې اخیستنې ته وسپارل شي، چې د سیمې د اوسېدونکو د تګ راتګ په آسانتیا کې به مهم رول ولوبوي.
نېټه: ۱۴۴۷/۶/۳۰ هــ ق
له پېښو سره د مبارزې آمادګۍ ملي اداره
