د پنجشېر ولایت په مرکز کې د طبیعي پېښو له خطر سره د مخ سیمو سروې او تثبیت بهیر ترسره شو
له پېښو سره د مبارزې آمادګۍ ادارې د لارښوونې پر بنسټ، د پنجشېر ولایت له پېښو سره د مبارزې آمادګۍ ریاست یوه تخنیکي پلاوي، چې د ولایت مقام، د بازارک د پنجشېر سیند د فرعي حوزې او د کانونو ریاست استازي پکې شامل وو، د طبیعي پېښو له خطر سره د مخ سیمو د پېژندنې، تشخیص او تثبیت په موخه د پنجشېر ولایت مرکز بازارک د شپږم ګذر اړوند د کوهشابه او آستانې کلیو په څو خطرناکو سیمو کې تخنیکي سروې او ارزونه ترسره کړه.
په دې سروې کې د کوهشابه سیمې اته زیانمنې نقطې، چې لیاره، کوټه، کمر خاکستري، تهي ګزک، نرمه، ځنګل او د آریانا لومړنی ښوونځی پکې شامل دي او د واورې ښویېدنې، د ډبرو لوېدو او سېلابونو له ګواښ سره مخ دي، تر تخنیکي ارزونې او څېړنې لاندې ونیول شوې.
د سروې پلاوي د ګذر د وکیل او د سیمې د اوسېدونکو په همکارۍ زیانمنې سیمې وارزولې، د هغو جغرافیایي کورډیناټ یې ثبت کړل او د پخوانیو پېښو او د شته ګواښونو اړوند معلومات یې راټول کړل. همداراز د احتمالي خطرونو د کمولو په موخه اړینې تخنیکي سپارښتنې او حللارې وړاندې شوې.
همدارنګه، د پلاوي غړو د انځورونو او تخنیکي معلوماتو د ثبت ترڅنګ، د سیمې اوسېدونکو ته د احتمالي خطرونو، د خوندیتوب لارو چارو او له پېښو سره د مبارزې آمادګۍ ریاست سره د اړیکو د ټینګولو په اړه عامه پوهاوی ورکړ او د یاد ریاست د مسؤلینو او کارکوونکو د اړیکو شمېرې لرونکي ویزېټ کارتونه یې د خلکو ترمنځ ووېشل.
نېټه: ۱۴۴۷/۱۲/۲۳ هـ ق
له پېښو سره د مبارزې آمادګۍ اداره
