د کندز ولایت له پېښو سره د مبارزې آمادګۍ ریاست د مرکز په قندهاري تپه علي کلي کې د زیانمن شوي سړک د بیارغونې د پروژې کار پیل کړ
له پېښو سره د مبارزې آمادګۍ ادارې د لوی رئیس، محترم الحاج ملا نورالدین ترابي په لارښوونه، د کندز ولایت له پېښو سره د مبارزې آمادګۍ ریاست، د خلکو د تګ راتګ ستونزو د حل په موخه د یاد ولایت د مرکز قندهاري تپه علي کلي د سړک، چې د وروستیو سېلابونو له امله ویجاړ شوی و، د بیارغونې کار پیل کړ.
په دې پروژه کې د ۶۵ مترو په اوږدوالي، ۸ متره پلنوالي او د ۱ متر په لوړوالي د سړک د بیارغونې کار ترسره کېږي او ۷۰۰ ګبیوني جالونه هم پکې کارول کېږي او د چارو د پلي کولو لپاره یو اسکواټور او د سیمې ۲۰ تنه کاریګر په کار لګول شوي، چې د ګبیوني جالونو د ډکولو، ځای پر ځای کولو او د سړک د استحکام په چارو کې به ونډه اخلي.
له پېښو سره د مبارزې آمادګۍ رئیس، محترم مولوي شفیق الله جواد وویل، د دې پروژې اساسي موخه د سیمې د خلکو د تګ راتګ ستونزو هوارول او د سېلابونو له امله د زیانمن شوي سړک بېرته رغول دي. نوموړي ټینګار وکړ چې د خلکو د ژوند د اسانتیا، د قدرتي پېښو د اغېزو د کمولو او د عامه زیربناوو د ساتنې لپاره به ورته پروژې په راتلونکې کې هم دوام ومومي.
د سیمې اوسېدونکو د یادې پروژې له پیل څخه خوښي څرګنده کړه او د کندز ولایت له پېښو سره د مبارزې آمادګۍ ریاست له هڅو او خدمتونو څخه یې مننه او قدرداني وکړه.
