د کندز ولایت له پېښو سره د مبارزې آمادګۍ ریاست ۱۳۸ سېلاب ځپلو کورنیو ته خوراکي او غیرخوراکي مرستې ووېشلې

له پېښو سره د مبارزې آمادګۍ ادارې د مشرتابه لخوا د IOM او WFP دفترونو سره د همغږۍ پر بنسټ، د کندز ولایت له پېښو سره د مبارزې آمادګۍ ریاست د یادو دفترونو په مالي ملاتړ هغو ۱۳۸ کورنیو ته چې د وروستیو سېلابونو له امله زیانمنې شوې وې، له سروې وروسته خوراکي او غیرخوراکي مرستې ووېشلې.

په دې لړۍ کې د مسؤلینو په شتون کې، د خوړو نړیوال پروګرام (WFP) لخوا هرې کورنۍ ته ۲۰۰ کیلو اوړه، ۱۸ کیلو غوړي، ۲۰ کیلو دال، ۲ کیلو مالګه او ۲ کیلو HEB بسکېټ ورکړل شول. همدارنګه د کډوالۍ نړیوال سازمان (IOM) له لوري هرې کورنۍ ته د پخلنځي د وسایلو یوه بسته، د کمپلو یوه بسته او د سولري څراغونو یوه بسته هم ووېشل شوه. 

سربېره پر دې، هغو ۶ کورنیو ته چې کورونه یې په بشپړه توګه ویجاړ شوي وو، د لنډمهالي سرپناه د برابرولو په موخه خېمې هم ورکړل شوې.
مسؤلین وایي، دا مرستې د زیانمنو کورنیو د لومړنیو اړتیاوو د پوره کولو او د طبیعي پېښو له امله د رامنځته شویو ستونزو د کمولو په موخه وېشل شوې دي

نېټه: ۱۴۴۷/۱۲/۱۵ هـ ق

له پېښو سره د مبارزې آمادګۍ اداره