له پېښو سره د مبارزې آمادګۍ ملي ادارې او د کډوالۍ د نړیوال سازمان (IOM) ترمنځ تخنیکي غونډه ترسره شوه
نن د چهارشنبې په ورځ له غرمې وروسته، له پېښو سره د مبارزې آمادګۍ ملي ادارې د نړیوالو اړیکو ریاست او د کډوالۍ د نړیوال سازمان (IOM) د تخنیکي پلاوي ترمنځ تخنیکي غونډه د دې ادارې په انګړ کې ترسره شوه.
د دې ناستې موخه د بېړنیو حالاتو پر مهال د دوه اړخېزه همکاریو د چټکتیا او اسانتیا او د طبیعي پېښو پر وړاندې د اغېزمنې ځواب وینې په اړه بحث او د نظرونه تبادله کول وو.
د ناستې په ترڅ کې، دواړو لوریو د پېښو پر مهال د سیمه ییزو رضاکارو ټیمونو د جوړولو او له هغوی څخه د کار اخیستو پر اړتیا ټینګار وکړ. هغوی دا ټیمونه د چټکې ځواب وینې، زیانمنو ټولنو ته د لاسرسي او د چمتووالي او احتمالي خطرونو په اړه د عامه پوهاوي د وړاندې کولو لپاره ډېر مهم وبلل.
همداراز، په ناسته کې دا هم څرګنده شوه چې د رضاکارو د روزنې، مجهز کولو او بسیج پروسه کولای شي د بېړنیو حالاتو پر مهال د ټولنو د مقاومت د لوړولو تر ټولو اغېزمنه لاره وي او دواړو لوریو د دې موضوع په اړه د ګډو میکانیزمونو پر جوړولو، د همغږۍ د پروګرامونو پر تدوین او د استراتیژیکو همکاریو په چوکاټ کې د معلوماتو شریکولو او د ځواب وینې د بهیر د اسانتیا پر اړتیا ټینګار وکړ.
نېټه: ۱۴۴۶/۱۱/۱۶ هــ ق
له پېښو سره د مبارزې آمادګۍ ملي اداره
