له پېښو سره د مبارزې آمادګۍ ملي ادارې او د ODSAD موسسې ترمنځ د ګډو همکاریو تفاهمنامه لاسلیک شوه
نن ورځ یکشنبه له غرمې وروسته، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د ODSAD موسسې له مرستیال خلیلالرحمن رحماني سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
ترابي صاحب، په دې لیدنه کې وویل چې د هېواد په کچه د ټولو مؤسسو لپاره د بشردوستانه فعالیتونو زمینه برابره ده، او موږ هڅه کوو چې هرې موسسې ته چې په هر ولایت کې فعالیت کوي، د مرستو رسونې اسانتیا برابره کړو.
له پېښو سره د مبارزې آمادګۍ ملي ادارې سرپرست زیاته کړه، چې ولایتي ریاستونو ته لارښوونه شوې ده، څو له مؤسسو سره همکاري وکړي او د هغوی ستونزې پر وخت حل کړي.
په همدې حال کې د ODSAD موسسې مرستیال خلیلالرحمن رحماني وویل، چې دا موسسه د افغانستان خلکو ته په بېلابېلو برخو کې مرستې رسوي او هڅه کوي، چې مرستې پر وخت اړمنو ته ورسوي.
دواړو لوریو د ۴۰,۹۰۰ امریکايي ډالرو په ارزښت، د خطرونو د کمولو، بیړني غبرګون او د ژوند ژغورنې په اقداماتو سره د تخار ولایت د نمکآب ولسوالۍ د ټولنې د زغم لوړولو په موخه د ګډو همکاریو تفاهمنامه لاسلیک کړه.
د دې تفاهم نامې له مخې به، د UN-OCHA دفتر کلستر د معیاري فورمې په کارولو سره د زیانمنونکو سیمو بېړنۍ ارزونې، د ۴۶۰ کاریګرو لپاره د نغدي مرستو وېش، په داسې ډول چې ۳۰۰ کاریګرو ته به هره ورځ ۴۲۷ افغانۍ، او ۱۶۰ کاریګرو ته به هره ورځ ۸۰۰ افغانۍ ورکړل شي، د مستفیدینو لپاره د روزنيزو پروګرامونو تنظیم او د کار وسایلو وېش؛ د استنادي، ګبیوني او محافظتي دیوالونو د جوړولو لپاره د ساختماني موادو برابرول او د تخار ولایت له پېښو سره د مبارزې آمادګۍ ریاست او د ODSAD موسسې د کارکوونکو لپاره به په تخار ولایت کې ترانسپورتي اسانتیاوو برابرې او روزنيز پروګرامونه پلي شي.
نېټه:۱۴۴۶/۱۰/۲۹ هــ ق
له پېښو سره د مبارزې آمادګۍ ملي اداره
