له پېښو سره د مبارزې آمادګۍ ملي ادارې او د OHW موسسې ترمنځ د ګډو همکاریو دوه تفاهم نامې لاسلیک شوې

نن ورځ یکشنبه له غرمې وروسته، له پېښو سره د مبارزې آمادګۍ ملي ادارې د مالي او اداري عمومي رییس او سرپرست الحاج مولوي محمد علم عالمیار، د OHW موسسې مرستیال ډاکټر حکمت الله عثماني سره وکتل او له یادې موسسې سره یې د ګډو همکاریو دوه تفاهم نامې لاسلیک کړې.
په دې ناسته کې دواړو لوریو د ژمي په موسم کې د زیانمنو شویو خلکو لپاره د مرستو رسولو، نورو اړوندو فعالیتونو او د دوامداره همکارۍ په اړه یې بحث وکړ او د پروژو په پلي کېدو کې یې د همغږۍ پر اهمیت ټینګار وکړ.
لومړۍ تفاهم نامه: د ۷۳۷,۵۴۸ ډالرو په ارزښت، چې ۱۸۳۰ زیانمنو کورنیو ته په هلمند، سرپل او تخار ولایتونو کې په داسې ډول چې، ۷۲۰ کورنیو ته په هلمند، ۳۴۰ کورنیو ته په سرپل او ۷۷۰ کورنیو ته په تخار ولایت کې هرې کورنۍ ته د ۲۰۰ ډالرو په ارزښت د سون توکي، د ۷۴ ډالرو په ارزښت ژمنۍ البسې او د ۵۷ ډالرو په ارزښت ۵ تختې کمپلې وېشل کېږي.
دویمه تفاهم نامه: د هرات ولایت په انجېل ولسوالۍ کې د ۹۳،۵۵۴ ډالرو په ارزښټ ۷۵ تشنابونه، ۱۵۰ کورنیو ته ۵ تختې کمپلې، ۵۰ کورنیو ته ۷۰ ډالره نغدي پیسې، ۱۵۰ کورنیو ته سولري برق سیستم او د ۷۵ کورنیو لپاره به د اوبو فلټرونه چمتو کېږي. 

نېټه: ۱۴۴۶/۵/۲۹
له پېښو سره د مبارزې آمادګۍ ملي اداره