له پېښو سره د مبارزې آمادګۍ ملي ادارې د سرپرست او د DRC موسسې رئیسې ترمنځ د ۱,۲۲۴,۲۴۲ ډالرو په ارزښت د ګډو همکاریو تفاهمنامه لاسلیک شوه
نن ورځ (دوشنبه) له ماسپښین وروسته، له پېښو سره د مبارزې آمادګۍ ملي ادارې سرپرست الحاج ملا نورالدین ترابي، د DRC مؤسسې له رئیسې دانیا الشریف او د هغې مل پلاوي سره په خپل کاري دفتر کې وکتل او د ګډو همکاریو تفاهمنامه یې ورسره لاسلیک کړه.
په دې ناسته کې، ترابي صاحب د DRC موسسې پلاوي ته د ښه راغلاست ویلو ترڅنګ څرګنده کړه چې موږ د موسسو د فعالیتونو لپاره لازمې اسانتیاوې برابرې کړې دي، د دوی کارونه په خپل وخت ترسره کوو، او له هغوی څخه هم غواړو چې خپل کارونه په چټکۍ او روڼتیا سره سر ته ورسوي.
له پېښو سره د مبارزې آمادګۍ ملي ادارې سرپرست د قرانکریم آیتونو ته په اشارې سره وویل چې د یو انسان د ژوند ژغورنه د ټول بشریت د ژغورنې په معنا ده. نوموړي د ماین پاکۍ له موسسې وغوښتل چې خپل فعالیتونه ګړندي کړي او ژر تر ژره په ماینونو او ناچاودو توکو ککړې سیمې پاکې کړي، تر څو خلک له احتمالي خطرونو وژغورل شي.
وروسته، د DRC مؤسسې رئیسې، دانیا الشریف، د ادارې له سرپرست څخه د موسسو د فعالیتونو لپاره د مناسبو شرایطو د برابرولو له امله مننه وکړه او د دې موسسې د روانې پروژې په اړه یې معلومات وړاندې کړل. هغې وویل چې په دې پروژه کې د ماینونو او ناچاودو توکو د خطرونو په اړه د عامه پوهاوي، سروې او د ککړو سیمو د پاکولو برنامی شاملی دي.
د یادونې وړ ده چې دغه موسسه به د ۱,۲۲۴,۲۴۲(۱ میلیون، ۲۲۴ زره او ۲۴۲) ډالرو په ارزښت، په ماینونو او ناچاودو توکو ککړې ۲۲۴،۴۰۰ مترمربع سیمې سروې او پاکې کړي. دا فعالیتونه به په کابل، پروان، لوګر، میدان وردګ او غزني ولایتونو کې ترسره شي، چې ۴,۱۹۵ کسان به په مستقیم او غیر مستقیم ډول له دغو فعالیتونو څخه ګټه واخلي، او ۱۲,۹۶۰ کسانو ته به د ماین او ناچاودو توکو له خطرونو څخه د خوندیتوب په موخه عامه پوهاوی ورکړل شي.
نېټه:۱۴۴۶/۸/۱۸
له پېښو سره د مبارزې آمادګۍ ملي اداره
