له پېښو سره د مبارزې آمادګۍ ملي ادارې سرپرست او د اي ټي سي مؤسسې ترمنځ تفاهم‌نامه لاس لیک سوه

 له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، نن سهار  یکشنبه په خپل کارې دفتر کې د اي ټي سي د ماین پاکولو مؤسسې له مرستیال، محترم حزب الله عابد سره ولیدل او په بغلان ولایت کې د دې مؤسسې د ماین پاکولو پروژې د پلي کولو په اړه یې خبرې وکړې.  
ترابي صاحب  په خپلو خبرو کې مېلمنو ته ښه راغلاست   ووایه او زیاته یې کړه: چي موږ مؤسسې را دعوتوو، تشویقوو یې، سهولتونه ورته برابروو، او په هر ولایت کې چې دوی خپلې پروژې پلي کوي، ملاتړ یې کوو او د هغوی تفاهم‌نامي پر خپل وخت لاسلیکوو.
په دې ترڅ کې د ای ټي سي مؤسسې مرستیال د یادې مؤسسې په اړه معلومات وړاندې کړل او ویې ویل چې دا په افغانستان کې لومړۍ بشردوستانه ماین پاکولو مؤسسه ده چې د ملګرو ملتونو دفتر له‌خوا ملاتړ کېږي او له ۱۳۶۸ لمریز کال راهیسې تر اوسه پورې یې په ۳۲ ولایتونو کې فعالیت کړی دی.  
هغه زیاته کړه چې اوس مهال دوی په بغلان ولایت کې د بغلان نوي ولسوالۍ په اته کلیو کې د UN-OCHA دفتر په ملاتړ یو پروژه پلي کوي چې په ترڅ کې به یې ۴۹۵۷۷۳ متر مربع ساحه له ماینونو او ناچاودو مهماتو څخه پاکه سي.  
چې له دې پروژې به نېږدې ۲۰ زره تنه په مستقیم او غیر مستقیم ډول ګټه پورته کړي او ۴۹۳۵۷۶ امریکایي ډالره بودیجه   لري، چې یو کال به دوام وکړي او په دې کې به ۶۵ کسان په ۵ تخنیکي ټیمونو کې دندی ترسره کوي.
نیټه: ۱۴۴۶/۳/۱۲ هـ ق 
له پیښو سره دمبارزې اماده ګۍ ملي اداره