له پېښو سره د مبارزې آمادګۍ ملي ادارې سرپرست د عالیقدر امیرالمؤمنین حفظه الله په لارښونه د لوګر ولایت سېلاب ځپلو سیمو څخه لیدنه وکړه او زیانمنو ته د رسېدنې لپاره یې د مرستو پر برابرولو ټینګار وکړ

نن سهار د سې شنبې په ورځ، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، د دې ادارې د اطلاعاتو او نشراتو له رئیس، محترم حافظ محمد یوسف حماد سره یو ځای، د وروستیو سېلابونو له امله د زیانمنو خلکو د وضعیت د ارزونې په موخه لوګر ولایت ته سفر وکړ.
په دې سفر کې له پېښو سره د مبارزې آمادګۍ ملي ادارې سرپرست، د لوګر ولایت له پېښو سره د مبارزې آمادګۍ رئیس، محترم قاري نورالله محمود او ځایي مسؤلینو سره یو ځای، د یاد ولایت په مرکز کې د هارون‌خېلو او سرفي زیانمنو کلیو څخه لیدنه وکړه. د ادارې سرپرست، د سیمې له اوسېدونکو سره په لیدنه کې د سېلابونو له امله زیانمنو کورنیو سره خپله غمشریکي او خواخوږي څرګنده کړه او د هغوی ستونزې، اړتیاوې او وړاندیزونه یې له نږدې واورېدل.
محترم ترابي صاحب، د خلکو د راپورونو او نظرونو له اورېدو وروسته، د ولایت مسؤلینو ته لارښوونه وکړه چې ژر تر ژره زیانمنو خلکو ته د رسېدنې، د زیانونو په کره توګه د ارزونې او د بېړنیو مرستو د رسولو په برخه کې اړین ګامونه واخلي.
همدارنګه، د ادارې سرپرست د سرفي کلي د سېلاب د لارې څخه هم لیدنه وکړه او له خلکو سره یې خبرې وکړې.  
په پای کې محترم ملا نورالدین ترابي ټینګار وکړ چې د طبیعي پېښو له زیانمنو شویو کسانو سره مرسته، د خطرونو اغېزمن مدیریت، او د لا زیاتو زیانونو د مخنیوي لپاره د سرچینو برابرول له پېښو سره د مبارزې آمادګۍ ملي ادارې له مهمو لومړیتوبونو څخه دي.
ورته مهال، له پېښو سره د مبارزی امادګی ملی اداری سرپرست، الحاج ملا نورالدین ترابی په لوګر ولایت کې د یو میلیون افغانیو په ارزښت یوه بېړنۍ وقایوي پروژه هم منظوره کړه.   

نېټه: ۱۴۴۷/۰۱/۰۵ هـ ق
له پېښو سره د مبارزې آمادګۍ ملي اداره