له پېښو سره د مبارزې آمادګۍ ملي ادارې سرپرست په نیمروز ولایت کې د میلک پولې او د کډوالو لپاره د کډوالۍ نړیوال سازمان IOM له پنډغالي څخه لیدنه وکړه
نن ورځ یکشنبه، له پېښو سره د مبارزې آمادګۍ ملي ادارې سرپرست، محترم الحاج ملا نورالدین ترابي، نیمروز ولایت ته د خپل رسمي سفر په دوام کې، په میلک پوله کې د کډوالو پنډغالي او د کډوالۍ نړیوال سازمان (IOM) له پنډغالي څخه لیدنه وکړه.
په دې لیدنه کې، ترابي صاحب په یادو پنډغالو کې د کډوالو عمومي وضعیت، موجودو ننګونو او د وړاندې شویو خدماتو په اړه معلومات ترلاسه کړل، د پنډغالو مسئولینو د ترابي صاحب د لیدنې څخه هرکلی وکړ او د کډوالو بېړنۍ اړتیاوې او ستونزې یې ورسره شریکې کړې.
له پېښو سره د مبارزې آمادګۍ ملي ادارې سرپرست ډاډ ورکړ، چې د کډوالو د وضعیت د ښه والي لپاره به هڅې دوام ومومي، او دا اداره به د داخلي او نړیوالو بنسټونو سره په همغږۍ، اړمنو کورنیو ته لا ډېر خدمتونه وړاندې کړي.
د دې لیدنې موخه د کډوالو د وضعیت ارزونه او د بېړنیو او دوامداره مرستو د چمتو کولو لپاره د لا زیاتې همغږۍ رامنځته کول وو.
نېټه: ۱۴۴۶/۱۲/۱۸ هـ ق
له پېښو سره د مبارزې آمادګۍ ملي اداره
