له پېښو سره د مبارزې آمادګۍ ملي ادارې لوی رئیس د ملګرو ملتونو د پراختیايي پروګرام (UNDP) له لوړپوړي پلاوي سره وکتل
نن ورځ سې شنبه، له پېښو سره د مبارزې آمادګۍ ملۍ ادارې لوی رئیس، محترم الحاج ملا نورالدین ترابي د ملګرو ملتونو د پراختیايي پروګرام د ناورینونو د مدیریت د څانګې له رئیسې، اغلې شُوکو نوډا، په افغانستان کې د ملګرو ملتونو د پراختیایي پروګرام له رئیس، سټیفن روډرېکز، د یاد سازمان د اقلیم د مقاومت د پروګرام له مرستېال، محترم نجیب الله یوسفي او د باثباته معیشتونو د پروګرام له مرستېال، محترم عبدالحمید عمر سره په خپل کاري دفتر کې وکتل او د پېښو مدیریت اړوند پر موضوعاتو یې خبرې وکړې.
په پیل کې محترم ترابي صاحب د ملګرو ملتونو د د پراختیایي پروګرام پلاوي ته ښه راغلاست وویل او د دواړو لورو ترمنځ یې د همکارۍ پر پیاوړتیا ټینګار وکړ، په دې ناسته کې د هیواد د طبیعي پېښو، اقلیمي بدلونونو او د خلکو د ژغورنې او وقایوي پروژو په برخه کې د روانو او راتلونکو پروژو په اړه هر اړخیزې خبرې وسوې.
ترابي صاحب د پېښو د خطرونو مخنیوي او د پېښو د اغېزو کمولو په برخه کې د وقایوي پروژو پر اهمیت خبرې وکړې او زیاته یې کړه چې د اقلیم بدلون له امله د هېواد د طبیعي خطرونو کچه لوړه سوې ده، هغه د بنسټیزو وقایوي پروژو د پلي کولو په اړه وویل چې وقایوي پروژې ډیرې مهمې دي ځکه په لږ مصرف د ډیر زیان مخه نیول کیږي.
همدا راز، ترابي صاحب وویل چي زموږ د ادارې انجنیري ټیمونو د افغانستان په کچه د پېښو له خطرونو سره مخ سیمې سروې، پېژندلې او تثبیت کړې دي او په ډیټابیس کې مو ثبت کړې دي او اړتیا ده چې باید هلته د پېښو د خطرونو د مخنیوي لپاره وقایوي پروژې پلي سي او د ډېری پروژو ډیزاین ترتیب او د لګښت اټکل ترسره شوی دی.
ورپسې، د ملګرو ملتونو د پراختیايي پروګرام د ناورینونو د مدیریت د څانګې رئیسې، اغلې شُوکو نوډا د یادې ادارې د وروستیو هڅو ستاینه وکړه او ویې ویل چې د UNDP سازمان د افغانستان له خلکو سره د طبیعي پېښو د خطرونو د مخنیوي، چمتووالي، بیړني غبرګون او بیا رغونې په برخو کې د ملاتړ دوام ته ژمن دی. اغلې نوډا د اقلیمي بدلون د خطرونو د کمولو، د معیاري وقایوي زیربناوو د جوړولو او د سیمه ییزو ظرفیتونو د لوړولو لپاره د ګډو پروګرامونو پر پراخېدو ټینګار وکړ.
وروسته د افغانستان لپاره د ملګرو ملتونو د پراختیایي پروګرام رئیس، ښاغلي سټیفن رودریګز وویل، چي له پېښو سره د مبارزې آمادګۍ ملي ادارې په کارونو کې چټکتیا روښانه ده او د دې ادارې له لوري یې د موسسو د کارونو په چټکۍ سره ترسره کولو په پار مننه او قدرداني وکړه، نوموړي وویل، چې هغه لړلیک چې تاسو موږ ته راکړی دی او د پروژو معلومات پکښې شتون لري، موږ هڅه کوو چې له هغه لړلیک څخه معلومات واخلو او د پروژو د پلي کولو په برخه کې به ترې ګټه واخلو.
په پای کې دواړو لوریو د همغږۍ او همکاریو پر دوام او پیاوړتیا او د پېښو د مدیریت لپاره د ظرفیتونو پر لوړولو ټینګار وکړ.
نیټه: ۱۴۴۷/۶/۴ هــ ق
له پېښو سره د مبارزې آمادګۍ ملي اداره
