له پېښو سره د مبارزې آمادګۍ ملي ادارې ۱۱۵ مستحقو ماشومانو ته خوراکي مرستې ووېشلې
نن د چهارشنبې سهار، له پېښو سره د مبارزې آمادګۍ ملي ادارې د استعدادونو او د کار زده کړې د پرمختګ موسسې (OTED) په ملاتړ ۱۱۵ مستحقو ماشومانو ته خوراکي مرستې ووېشلې.
د مرستو د وېش پر مهال له پېښو سره د مبارزې آمادګۍ ملي ادارې استازي، محترم سید احمد عثماني وویل چې په دې مرستو کې ۱۰ کیلو وریجې، ۱۰ کیلو اوړه، ۴ کیلو کبان، ۴ کیلو خرما، ۵ کیلو بوره او ۳ لیټره غوړي شامل دي، چې مستحقو کسانو ته ووېشل شول.
محترم عثماني زیاته کړه چې د دې ادارې سرپرست ژمن دی تر څو د مرستو د جذب بهیر لا پراخ کړي او په راتلونکي کې به بېوزلو کورنیو ته نورې مرستې هم ورسوي.
د دې مرستو ترلاسه کوونکو له پېښو سره د مبارزې آمادګۍ ملي ادارې او د OTED موسسې څخه مننه وکړه او غوښتنه یې وکړه چې دا ډول مرستندویه پروګرامونه دې دوام ومومي، ځکه چې د بېوزلو کورنیو او زیانمنو ماشومانو د وضعیت په ښه کېدو کې مهم رول لري.
نېټه: ۱۴۴۷/۰۱/۲۷ هـ ق
له پېښو سره د مبارزې آمادګۍ ملي اداره
