په لغمان ولایت کې د یو استنادي دیوال د جوړېدو کار بشپړ او ګټې اخېستنې ته وسپارل شو
د لغمان ولایت له پېښو سره د مبارزې آمادګۍ ریاست، د یاد ولایت دولت شاه ولسوالۍ په بانډه دور بازار سیمه کې د ۳,۳۹۴,۴۶۰ (۳ میلیونه ۳۹۴ زره او ۴۶۰) افغانیو په لګښت د یو استنادي دیوال د جوړېدو کار له بشپړولو وروسته ګټې اخیستنې ته وسپاره.
په دی پروګرام کې چې د لغمان ولایت والي محترم شیخ شیر احمد حقاني, د یاد ولایت له پېښو سره د مبارزې آمادګۍ رییس او یو شمېر نورو سیمه ییزو مسؤلینو په شتون کې ترسره شو, د یاد ولایت والي له پېښو سره د مبارزې آمادګۍ ملي ادارې له هڅو ستاینه وکړه او ویې وېل چې د افغانستان اسلامي امارت مسؤلین تل د خلکو ستونزو ته د رسېدنې لپاره هڅې کوي او په راتلونکې کې به هم دغه ډول پروژې پلي کړي.
ورته مهال, د لغمان ولایت له پېښو سره د مبارزې آمادګۍ رییس قاري خیر محمد غازي ووېل چې, دا پروژه په لوړ کیفیت سره بشپړه شوه او د پروژې په بشپړېدو سره به د خلکو ډېرې ستونزې حل شي.
همداراز, د سېمې خلکو د پروژې په پار له یادې ادارې څخه مننه او قدرداني وکړه او ویې وېل, چې د استنادي دیوال په جوړېدو سره به د سیمې عمومي سړک او کرنیزې ځمکې د سیند د اوبو له خطر څخه خوندي پاتې شي.
نېټه: ۱۴۴۶/۱۰/۲۴ هـ ق
له پېښو سره د مبارزې آمادګۍ ملي اداره
