په کندهار ولایت کې د موسسو سره د همغږۍ غونډه ترسره شوه
کندهار- د مرغومي ۱۳مه-۱۴۰۱
الحاج مولوي شمس الدین حقیار، پېښو ته د رسېدو په چارو کې د دولت وزارت د نړیوالو اړیکو رییس، کندهار ولایت ته د خپل سفر په ترڅ کې د پېښو مدیریت په برخه کې د همکارو موسسو استازو او د یاد ولایت پېښو سره د مبارزې رییس او یو شمېر ولایتي مسوولینو په شتون کې د همغږۍ غونډې مشرۍ وکړه.
په دې غونډه کې د موسساتو د فعالیتونو د کړنلارې، د ۲۰۲۲ کال د فعالیتونو راپور او د ۲۰۲۳ کال لپاره د موسسو د پروګرامونو په اړه خبرې ترسره شوې.
وروسته د موسسو استازو د خپلو فعالیتونو او پروګرامونو په اړه معلومات وړاندې کړل او ټولو زیانمن شویو ته د رسېدنې په هکله ژمنتیا وښودله.
ورته مهال الحاج مولوي شمس الدین حقیار د دغه وزارت د نړیوالو اړیکو رییس، په جنوب زون کې د موسسو لخوا پېښو ته د رسېدو په چارو کې د دولت وزارت سره د ښې همغږۍ څخه په ستاینې سره ووېل: اړتیا ده ترڅو د دولتي ادارو او موسسو ترمنځ د فعالیتونو د روڼتیا او زیانمن شویو ته د رسېدنې لپاره ښه همغږۍ رامنځته شي.
ښاغلي حقیار د ارزګان، زابل، هلمند او نیمروز ولایتونو په فعالیتونو باندې په خبرو سره د رسېدنې او وقایوي پروګرامونو د پلي کېدو په برخه کې همکاري او همغږۍ رامنځته کولو غوښتنه وکړه.
