ميدان وردګو کې د طبيعي پېښو له ۵ زيانمنو کورنيو سره نغدي او غير نغدي مرسته ترسره شوه
د ميدان وردګو په مرکز ميدان ښار او نرخ ولسوالۍ کې له هغو ۵ کورنيو سره د نغدي مرستي تر څنګ د غذايي او غيرغذايي موادو مرسته ترسره شوه،
چي د وروستيو ورښتونو له امله يي کورونه تخريب او مرګ ژوبله ورته اوښتې وه. دغه مرسته د ولایتي ادارې په همکارۍ د طبیعي پېښو پر وړاندې د چمتووالي رياست او یونېسف موسسې لخوا ترسره شوه، چې پکې د هر شهيد کورنۍ ته د یاد رياست لخوا ۱۰ زره افغانۍ نغدي مرسته، ۲۰۰ کيلو ګرامه اوړه او د یونسیف موسسې لخوا هرې کورنۍ ته یوه تخته ترپال، د آشپزخانې لوازم، صحي کېټ، کمپلې او ځینې نور اړین توکي ووېشل شول.
د طبیعي پېښو پر وړاندې د چمتووالي ریاست مسوولین وایي، دا مهال په سيداباد، چک، دايميرداد، مرکز او نرخ ولسوالیو کې د مرستې په موخه سروې له پلان سره سمه روانه ده، چي پکې به له سلګونه زيانمنو کورنيو سره مرسته ترسره شي.
