۳۰۰۰ زیانمن شویو کورنیو ته په کابل کې د خوراکي او غیرخوراکي مرستو د وېش لړۍ پیل شوه
کابل- د لیندۍ ۲۲مه-۱۴۰۱
پېښو ته د رسېدو په چارو کې د دولت وزارت د بشري مرستو په ترڅ کې، نن ورځ ۳۰۰۰ زیانمن شویو او بېوزله کورنیو ته چې د کابل په ولسوالیو او مرکز کې یې کروندې د وروستیو بارانونو او سیلابونو له امله ویجاړې شوي وې، د خوراکي او غیر خوراکي مرستو د وېش لړۍ پیل کړه.
محترم ملا محمد عباس آخند پېښو ته د رسېدو په چارو کې د دولت وزیر د خوراکي مرستو د وېش په ترڅ کې ووېل: هرې کورنۍ ته به ۵۰ کیلو غنم، صابون او د اوبو پاکولو مواد ووېشل شي.
پېښو ته د رسېدو په چارو کې د دولت وزیر زیاته کړه: یادې مرستې له سروې وروسته په شفاف ډول مستحقینو ته وېشل کېږي او دغه لړۍ په ټول هېواد کې د نورو زیانمن شویو او بېوزله کورنیو لپاره په شفاف ډول دوام لري.
محترم ملا محمد عباس آخند، د مرستندویه هیوادونو، د ملګرو ملتونو دفترونو او خیریه موسسو څخه په راتلونکي ژمي کې د زیانمن شویو لپاره د بشري مرستو غوښتنه وکړه.
ورپسې قاري محمد خوشحال زمانی، د کابل ولایت پېښو سره د مبارزې رییس ووېل: دغه مرستې په درې کټګوري کې د زیانمن شویو لپاره وېشل شوي.
ښاغلي زماني ووېل چې په تېر یو کال کې څه د پاسه ۲۰ زره کورنیو ته نغدي، خوراکي او غیر خوراکي مرستې وېشل شوي او دغه لړۍ روانه ده.
