له پېښو سره د مبارزې آمادګۍ ملي ادارې سرپرست په روسیه کې مېشت د افغان سوداګرو لخوا مرسته سوي خوراکي موادو تسلیمي واخیسته
نن ورځ له غرمې مخکې له پېښو سره د مبارزې آمادګۍ ملي ادارې سرپرست الحاج ملا نورالدین ترابي د خبریالانو او رسنیو په شتون کې په روسیه کې مېشت د افغان سوداګرو لخوا د اړمنو لپاره مرسته شوي خوراکي توکي د افغان بزنس سنټر استازي محترم عبدالسمیع الکوزي څخه تسلیمي واخیسته.
ترابي صاحب خبریالانو ته ووېل چې نن ورځ مو په روسیه کې مېشت د افغان سوداګر له استازي څخه ۳۵.۵ ټنه خوراکي توکي چې پکښې۵۰۰ بورۍ اوړه، ۳۰۰ بورۍ وریجې او ۳ ټنه غوړي شامل دي مونږ یې تسلیمي واخیسته او له هغوی یې په قدردانۍ سره د نورو مرستو غوښتنه هم وکړه.
نوموړي د خبریالانو لخوا د راتلونکي ژمي لپاره د ژمنیو مرستو په اړه پوښتنو ته په ځواب ویلو سره ووېل چې موږ راتلونکي ژمي ته د چمتووالي په حالت کې یو او په دی اړه مو له موسسو او بېلابېلو سازمانونو سره خبرې هم کړې دي چې د کډوالۍ نړیوال سازمان په بېلابېلو ولایتونو کې اړمنو ته د نغدو پیسو د وېش ژمنه کړې ده.
له پېښو سره د مبارزې آمادګۍ ملي ادارې سرپرست، د دې ترڅنګ چې د سروې او خلکو ته د مرستو د وېش په برخه کې د شفافیت رامنځته کولو ډاډ ورکړ او زیاته یې کړه چې په تېرو څه باندې دوه میاشتو کې مو په مجموع کې څه د پاسه ۳۵ میلیونه ډالرو په ارزښت په بېلابېلو برخو کې د مرستو د وېش هوکړه لیکونه لاسلیک کړي دي .
ورته مهال عبدالسمیع الکوزي ووېل، دغه مرستې په روسیه کې مېشت د افغان بزنس سنټر مشر محترم حاجي نادرشاه لخوا ترسره شوې دي او اختیار یې له پېښو سره د مبارزې آمادګۍ ملي ادارې سره دی چې له چا سره مرسته کوي او دغه ډول مرستې به په راتلونکې کې هم دوام ومومي.
د ربیع الاول ۲۳-۱۴۴۶
له پېښو سره د مبارزې آمادګۍ ملي اداره
