له پېښو سره د مبارزې آمادګۍ ملي ادارې سرپرست په ایټالیا کې د اروپایي السلام خیریه موسسې رییس او د اروپا د پارلمان له سلاکار سره وکتل
نن ورځ د سهشنبه سهار، له پېښو سره د مبارزې آمادګۍ ملي ادارې سرپرست الحاج ملا نورالدین ترابی، په ایټالیا کې د اروپایي السلام خیریه موسسې رییس ډاکټر سمونا فرنانډیز، د اروپا د پارلمان سلاکار ډاکټر باسم حتاحت او په افغانستان کې د السلام موسسې رییس حمیدالله جویا سره په خپل کاري دفتر کې وکتل.
په دې ناسته کې الحاج ملا نورالدین ترابی د ښه راغلاست ویلو ترڅنګ، په هیواد کې د پېښو مدیریت اړوند پر ننګونو خبرې وکړې او ویې ویل چې افغانستان د جغرافیایي موقعیت له مخې د ګڼو طبیعي پېښو له خطر سره مخ دی.
محترم ترابی صاحب زیاته کړه، چې سیلابونه، زلزلې، د ځمکې ښویېدنه او نورو پېښو زموږ خلکو ته زیانونه او تلفات اړولي دي، له دې امله اړتیا ده چې موسسې د وقایوي پروژو په پلي کولو کې زیات فعالیت وکړي.
نوموړي وویل چې د خطر سره مخ د سیمو سروې روانه ده او د اضطراري پروژو ارزونه هم ترتیب شوې او د دې پروژو ډیټابیس په اداره کې شته همدارنګه د وقایوي پروژو د پلي کولو په برخه کې یې د همکارۍ غوښتنه هم وکړه.
ترابی صاحب وویل چې موږ له تاسو څخه د اسلامي امارت د اصولو په چوکاټ کې ملاتړ کوو او هیله لرو چې تاسو هم د پروژو په پلي کولو کې د شفافیت او چټکتیا په برخه کې ډېر پام وکړئ.
وروسته په ایټالیا کې د اروپایي السلام خیریه موسسې رییس ډاکټر سمونا فرنانډیز، د خپلې موسسې د نړیوالو فعالیتونو په اړه خبرې وکړې او ویې ویل چې د اسلامي امارت نافذه قوانینو او کلتور ته په درناوي سره یاده موسسه د بېړنیو بشري مرستو او د وقایوي پروژو په پلي کولو کې د دوه اړخیزه همکاریو لپاره چمتو ده.
هغې په هیواد کې د وروستیو پېښو او بارانونو په اړه د معلوماتو غوښتنه وکړه او ویې ویل چې له پېښو سره د مبارزې آمادګۍ ملي ادارې د غوښتنې سره سم موږ هڅه کوو چې د اروپايي هیوادونو څخه د پېښو مدیریت په برخه کې زیاتې مرستې راجلب کړو.
په پای کې دواړو لوریو د ګډو همکاریو په اړه خبرې وکړې او د پېښو مدیریت په برخه کې یې د دوه اړخیزه همکاریو د هوکړه لیک پر لاسلیک باندې ټینګار وکړ.
نیټه: ۱۴۴۶/۷/۶
له پیښو سره د مبارزې آمادګۍ ملي اداره
