په کونړ ولایت کې د استنادي دیوال د جوړولو کار پرانستل شو
د عالیقدر امیرالمومنین حفظ الله د حکم له مخې, د هېواد په ټولو ولایتونو کې د پېښو د خطرونو کمولو په موخه د بېړنیو کوچنیو وقایوي پروژو پلي کولو په پار د هر ولایت لپاره یو میلیون افغانۍ ځانګړې شوي دي, او دا پروژې به له پېښو سره د مبارزې آمادګۍ ملي ادارې لخوا پلي کېږي, چې نن ورځ د کونړ ولایت له پېښو سره د مبارزې آمادګۍ ریاست، د یاد ولایت ډانګام ولسوالۍ په دوبندو خور سیمه کې د یو میلیون افغانیو په ارزښت د استنادي دیوال د جوړولو کار پیل کړ.
د دې پروژې د پرانستلو په مراسمو کې، د کونړ ولایت له پېښو سره د مبارزې آمادګۍ ریاست، الحاج قاري ثابتالله صدیقي، وویل چې د اسلامي امارت مشرتابه د بېړنیو او اړینو پروژو د پلي کولو لپاره د دې ولایت لپاره یو میلیون افغانۍ ځانګړې کړې دي. نوموړي زیاته کړه چې دا استنادي دیوال د خلکو د اړتیاوو په پام کې نیولو سره جوړیږي او د سیلابونو له خطر څخه د نوي جوړ شوي پل او سلګونه جریبه کرنیزو ځمکو په ساتنه کې مهم رول لري.
ورپسې، د کونړ ولایت د مقام د دفتر رئیس، مولوي محمد امین حقپرست، ټینګار وکړ چې د اسلامي امارت مسئولین د خلکو له ستونزو خبر دي او د حل لپاره یې اقدامات کوي.
له بلې خوا، د ډانګام ولسوال، مولوي عمر صدیق، د ولایت مقام او له پېښو سره د مبارزې آمادګۍ ریاست له مسئولینو څخه د خلکو غوښتنو ته د پاملرنې او پر وخت اقدام له امله مننه وکړه.
د یادونې وړ ده، چې دا استنادي دیوال به د ۵۰ متره په اوږدوالی او ۲۳۴ متر مکعب په حجم سره جوړېږي، او په بشپړېدو سره به د دوبندو خور سیمې اوسېدونکي د احتمالي سیلابونو له خطر څخه خوندي پاتې شي.
نېټه:۱۴۴۶/۹/۴
له پېښو سره د مبارزې آمادګۍ ملي اداره
