د پکتیکا ولایت د سروضې ولسوالۍ د سلطانو کلي او چهاربران ولسوالۍ ترمنځ د سړک د جغلاچولو کار پیل شو
د پکتیکا ولایت له پېښو سره د مبارزې آمادګۍ ریاست, د یاد ولایت د سروضې ولسوالۍ د سلطانو کلي له بازار څخه تر چهاربران ولسوالۍ پورې د سړک د جغل اچولو د پروژې کار د ټولګټو چارو ریاست په تخنیکي همکارۍ د یو میلیون افغانیو په ارزښت رسماً پیل کړ.
دا پروژه چې بودجه یې د عالیقدر امیـ..رالمؤمنین حفـ..ظهالله د لارښوونې له مخې د یو میلیون افغانیو په ارزښت منظوره شوې ده او له پېښو سره د مبارزې آمادګۍ ملي ادارې لخوا تمویل او پلي کېږي.
د یادې پروژې چارې به د مسلکي ټیم او قوي ماشینرۍ په مټ پر مخ وړل کېږي، چې موخه یې د سیمې خلکو ته د تګ راتګ اسانتیا برابرول، د طبیعي پېښو پر مهال د ژر لاسرسي زمینې برابرول او د اقتصادي فعالیتونو پراخېدل دي.
همدا راز,د سیمې اوسېدونکو دا پروژه د یوې مهمې اړتیا پوره کېدل وبلله او د ا.ا له مشرتابه او له پېښو سره د مبارزې آمادګۍ ملي ادارې څخه یې د دې پروژې د کار د پیل په پار مننه او قدرداني وکړه.
ورته مهال له پېښو سره د مبارزې آمادګۍ ریاست مسؤلینو ووېل, چې دا سړک به نه یوازې د مرستندویه خوراکي او غیرخوراکي توکو او نورو اړینو خدماتو د انتقال بهیر اسانه او ګړندی کړي, بلکې د سروضې او چهاربران ولسوالیو ترمنځ به د مسافرینو لپاره د سفر موده هم لنډه کړي, هغوی زیاته کړه چې د ا.ا.ا او له پېښو سره د مبارزې آمادګۍ ملي ادارې تل د هېوادوالو ستونزې په پام کې نیولې دي او دا اداره تل په دې هڅه کې ده, چې په هېواد کې د پېښو د خطرونو کمولو په موخه وقایوي پروژې پلي کړي ترڅو د هېوادوالو ځان او مال خوندي وساتل شي.
نېټه: ۱۴۴۶/۱۲/۲۵ هـ ق
له پېښو سره د مبارزې آمادګۍ ملي اداره
