د لوګر ولایت له پېښو سره د مبارزې آمادګۍ ریاست د وروستیو سېلابونو له امله ۱۲۵ زیانمنو کورنیو ته بېړنۍ مرستې ووېشلې
د لوګر ولایت په مرکز پل علم او محمد آغه ولسوالۍ کې د وروستیو سېلابونو په راتلو سره, د یاد ولایت له پېښو سره د مبارزې آمادګۍ ریاست ۱۲۵ زیانمنو کورنیو ته له سروې وروسته د خوراکي او غیرخوراکي توکو بېړنۍمرستې ووېشلې.
په دې لړۍ کې, د یاد ولایت والي او سیمه ییزو مسؤلینو په شتون کې,۴۸ کورنیو ته چې کورونه یې په بشپړه توګه ویجاړ شوي وو, هرې کورنۍ ته ۱۰۰ کیلو غنم, ۵ لیټره غوړي, یوه مکمل الاسباب خیمه, ۶ تختې کمپلې, یو کارتن صابون او د یوبار مصرف لوښي, او ۷۷ کورنیو ته چې کورونه یې په جزوي ډول ویجاړ شوي وو, هرې کورنۍ ته ۱۰۰ کیلو غنم, ۵ تختې کمپلې او یو کارتن صابون ووېشل شول.
نېټه: ۱۴۴۷/۰۱/۰۵
له پېښو سره د مبارزې آمادګۍ ملي اداره
