د میدان وردګ ولایت له پېښو سره د مبارزې آمادګۍ ریاست ۵۵ کارګرانو ته د کار په بدل کې خوراکي او غیر خوراکي توکي ووېشل
د میدان وردګو ولایت له پېښو سره د مبارزې آمادګۍ ریاست له پېښو سره د مبارزې آمادګۍ ملي ادارې د سرپرست په لارښوونه د چک ولسوالۍ ۵۵ کارګرانو ته د کار کولو په بدل کې خوراکي او غیر خوراکي مرستې ووېشلې.
دغه کارګران د چک ولسوالۍ په بیکسمند سیمه کې د بندو سړکونو، بندونو، کاریزونو او ویالو د بیا پرانیستلو لپاره ګمارل شوي وو، چې د ۱۴ ورځو په اوږدو کې دغه لارې او تأسیسات ترمیم او د دوه یم ځل لپاره ګټې اخیستنې ته وسپارل شول.
د کار په بدل کې، هر کارګر ته دوه بورۍ ۵۰ کیلویي غنم، څلور بورۍ ۲۵ کیلویي وريجې، یوه د یونیسف د اوبو بشکه، یوه پاڼه د کلورین د کارولو لارښود او د اوبو د فلټر کولو لپاره یو څه کلورین ورکړل شول.
د یادونې وړ ده چې د میدان وردګو ولایت په چک ولسوالۍ کې وروستیو سېلابونو د استوګنې کورونه په کلي او قسمي توګه ویجاړ کړي، سړکونه، بندونه، کاریزونه، ویالې او فصلونه یې زیانمن کړي دي. د میدان وردګ ولایت له پېښو سره د مبارزې آمادګۍ ریاست زیانمنو کورنیو ته د خوراکي او غیر خوراکي توکو د مرستو د وېشلو سربېره، د عامه تأسیساتو د بیارغونې لپاره پراخ اقدامات ترسره کړي دي، چې د ځایی اوسېدونکو ستونزې یې حل کړې دي.
ځایی اوسېدونکو له پېښو سره د مبارزې آمادګۍ ملي ادارې او د اسلامي امارت د مشرتابه د اقداماتو څخه رضایت څرګند کړ او د هغوی ستاینه یې وکړه.
نېټه: ۱۴۴۷/۰۲/۰۴ هـ ق
له پېښو سره د مبارزې آمادګۍ ملي اداره
